Ukrayna və Almaniya birgə hərbi-müdafiə müəssisəsi açıb
Kiyev, 21 yanvar, AZƏRTAC
“Leopard 2” tanklarını istehsal edən Almaniyanın “KNDS Deutschland” şirkəti Ukraynanın müdafiə şirkətlərindən biri ilə rəsmən birgə müəssisə açıb.
AZƏRTAC xəbər verir ki, bu barədə Ukraynanın strateji sənaye naziri German Smetanin bildirib.
“KNDS Deutschland” ilə Ukraynanın müdafiə müəssisələrindən biri arasında birgə müəssisənin rəsmi açılışını elan etməkdən məmnunam”, - deyə Smetanin əlavə edib.
Nazirin sözlərinə görə, yeni yaradılan şirkət alman şirkətinin Ukrayna Müdafiə Qüvvələrinə verdiyi hərbi texnikanın texniki xidməti və təmiri üzrə ixtisaslaşacaq.
“Ukraynalı mütəxəssislər artıq Almaniyada təlim keçiblər və ilk sistemlər artıq obyektlərdə quraşdırılıb”, - deyə Smetanin bildirib.
Birgə müəssisənin işi həm də investisiya və iş yerləri vasitəsilə iqtisadiyyatı əhəmiyyətli dərəcədə dəstəkləyəcək.
Xatırladaq ki, hələ 2024-cü ilin martında Paris və Berlin, xüsusən də tanklar istehsal edən Fransa-Almaniya şirkəti KNDS-ə Ukraynada filial yaratmaq imkanı verəcək razılaşma əldə etmişdilər.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
