ULDUZLAR SÖNMÜR
İSTEDADLI AZƏRBAYCAN ARTİSTİNİN MOSKVADA XATİRƏ GECƏSİ
Səfirliyin birinci katibi Fərhad Ağamalıyev diplomatik nümayəndəliyimizin və Ümumrusiya Azərbaycan Konqresinin təşəbbüsü ilə təşkil olunmuş gecəni açaraq dedi ki, Lütfəli Abdullayevin ulduzu Azərbaycan mədəniyyət xadimlərinin parlaq kəhkəşanında həmişə işıq saçacaqdır. Xalqımız bu istedadlı aktyorun yaradıcılığını, şəxsiyyətini sevir, onun yumoru indiyədək folklor inciləri kimi qarşılanır. O, öz sənətinin klassiki idi.
Gecədə çıxış edənlərin hər biri böyük aktyorun ustalığının bu və ya digər xüsusiyyətini vurğulayır, onun yaradıcılığı barədə şəxsi təəssüratını bölüşürdü. ÜAK-ın vitse-prezidenti, icra aparatının rəhbəri Natiq Ağamirov vurğuladı ki, L.Abdullayevin sənətini, onun istedadının dərinliyini hələ araşdırıb öyrənmək lazımdır. Artistin improvizasiyaları pyes və ssenarilərin çərçivəsindən həmişə kənara çıxırdı. O, məhz bununla Azərbaycan aktyorluq sənətinə əsl novatorluq ruhu gətirmişdir.
Sənətşünas, əməkdar mədəniyyət xadimi İlham Rəhimli Azərbaycan teatr sənətinin təşəkkülündə Lütfəli Abdullayevin rolundan danışdı. O dedi ki, L.Abdullayev, haqlı olaraq, Azərbaycan musiqili komediyasının ən görkəmli nümayəndələrindən biri sayılır, onun adı bu janrla qırılmaz surətdə bağlıdır. Lütfəli Abdullayev dahi Üzeyir Hacıbəyovun diqqətini cəlb etmiş tək-tük aktyorlardan biri və 30 yaşında Stalin mükafatına layiq görülmüş yeganə Azərbaycan aktyoru idi. Lütfəli Abdullayev öz yaradıcılığı ilə həm komediya, həm də dram janrını əhatə etmiş nadir aktyordur. Onun adını musiqili komediya janrının özü ilə eyniləşdirmək olar, onun yaratdığı və böyük aktyorun fərdiliyinin dəqiq nəzərə çarpdığı parlaq obrazlar Azərbaycan teatr sənətinin tarixində əbədi qalacaqdır.
Gecədə xalq artisti Yaşar Nuri, Bəşir Səfəroğlu adına teatrın bədii rəhbəri, xalq artisti Afaq Bəşirqızı böyük məhəbbət və səmimiyyətlə çıxış etdilər. Onlar L.Abdullayev haqqında xatirələrini bölüşdülər, onun insani keyfiyyətlərindən söz açdılar.
Xatirə gecəsində iştirak edən Lütfəli Abdullayevin ailə üzvləri ölkəmizin Rusiyadakı səfiri Ramiz Rizayevə və ÜAK-ın rəhbərliyinə, habelə böyük Azərbaycan aktyorunun xatirəsinə ehtiramını bildirməyə gəlmiş tədbir iştirakçılarına dərin təşəkkürlərini bildirdilər.
Yubiley münasibətilə təşkil olunmuş konsert proqramında Nazpəri Dostəliyeva, Sərxan Sərxan, Samir Cəfərov və başqa müğənnilər çıxış etdilər, aktyorların ifasında yumoristik səhnələr göstərildi, “Arşın mal alan” filmindən parçalar nümayiş etdirildi.
Bölmənin digər xəbərləri
