ULU ÖNDƏR HEYDƏR ƏLİYEVİN AZƏRBAYCAN XALQI QARŞISINDAKI XİDMƏTLƏRİ HEÇ ZAMAN UNUDULMAYACAQDIR
AZƏRTAC xəbər verir ki, aprelin 28-də Azərbaycan Həmkarlar İttifaqları Konfederasiyası (AHİK) Əmək və Sosial Münasibətlər Akademiyası ilə birgə xalqımızın dahi oğlu, müdrik siyasətçi Heydər Əliyevin 85 illik yubileyi ilə əlaqədar “Heydər Əliyev və həmkarlar ittifaqları” mövzusunda elmi-praktiki konfrans keçirmişdir.
AHİK-in sədri, Milli Məclisin deputatı Səttar Mehbalıyev ümummilli lider Heydər Əliyevin müstəqil Azərbaycan dövlətçiliyinin, eləcə də onun daxili və xarici siyasət konsepsiyasının banisi olduğunu vurğulamışdır. Natiq qeyd etmişdir ki, ulu öndərimiz xalqın təkidli tələbi ilə hakimiyyətə qayıtdığı ilk illərdən dövlətimizin xarici siyasət kursunu, prinsiplərini zərgər dəqiqliyi ilə müəyyənləşdirmişdir.
Bildirilmişdir ki, məhz bu dövrdə Azərbaycan Həmkarlar İttifaqları da öz inkişafının yeni mərhələsinə qədəm qoymuşdur. Respublikamızı dərin sosial-iqtisadi və siyasi böhrandan çıxaran ümummilli liderimiz Heydər Əliyev həmkarlar ittifaqları təşkilatlarını müxtəlif siyasi qüvvələrin təsirindən qoruyaraq, bu quruma öz missiyasını yerinə yetirmək üçün hərtərəfli şərait yaratmış, onun uzun illər ərzində formalaşmış maddi-texniki bazasının dağıdılmasının qarşısını almışdır. Bir sözlə, demokratik idarəçilik prinsiplərinə əsaslanan AHİK-in möhkəmlənməsinə və fəaliyyət dairəsinin genişlənməsinə dəstək verilmişdir. Ümummilli lider Heydər Əliyevin qayğısı sayəsində 1994-cü ildə qəbul olunmuş “Həmkarlar ittifaqları haqqında” Qanun həmkarlar ittifaqları üzvlərinin əmək hüquqlarının daha mütəşəkkil müdafiə olunması, onların sosial və digər problemlərinin həlli üçün möhkəm hüquqi baza yaratmışdır.
Natiq ulu öndər Heydər Əliyevin işçilərin pozulmuş hüquqlarının bərpası ilə əlaqədar həyata keçirdiyi tədbirlərin həmkarlar ittifaqları tərəfindən həmişə alqışlandığını və bu istiqamətdə onun tövsiyələrinin daim rəhbər tutulduğunu söyləmişdir.
Vurğulanmışdır ki, Azərbaycanın kurort və turizm sahəsində əldə etdiyi nailiyyətlər respublikamızın memarı və qurucusu ulu öndər Heydər Əliyevin və bu gün onun siyasətini uğurla davam etdirən Prezident İlham Əliyevin titanik zəhməti hesabına əldə edilmişdir. Ulu rəhbərin tövsiyələrinə əməl edən Azərbaycan Həmkarlar İttifaqları qadınların və gənclərin problemlərinin həlli istiqamətində dövlət siyasətinin hazırlanmasında yaxından iştirak etmişdir. AHİK İcraiyyə Komitəsinin qərarı ilə “AHİK-in gender siyasəti konsepsiyası” təsdiq olunmuşdur.
Ulu öndər Heydər Əliyevin Azərbaycan Həmkarlar İttifaqlarına verdiyi dəstək onun beynəlxalq arenada möhkəmlənməsi üçün geniş imkanlar açmışdır. Bu günədək AHİK 29 xarici ölkənin 34 həmkarlar ittifaqı təşkilatı ilə birbaşa əlaqələr yaratmış, Beynəlxalq Həmkarlar İttifaqları Konfederasiyasının üzvü kimi 168 mərkəz ilə fəaliyyətini əlaqələndirmişdir. Azərbaycan Həmkarlar İttifaqları sosial tərəfdaşlıq prinsiplərini üstün cəhətlərdən biri kimi qəbul edir. Həmkarlar İttifaqları əhalinin sosial şəraitinin yaxşılaşdırılması istiqamətində daha təsirli tədbirlər həyata keçirməyə imkan verən Baş Kollektiv Sazişin yerinə yetirilməsini diqqət mərkəzində saxlayır.
Konfransda Əmək və Sosial Münasibətlər Akademiyasının rektoru Hüseyn Qaraşov “Heydər Əliyev və Azərbaycanda həmkarlar ittifaqı hərəkatı”, bu təhsil ocağının dosenti, tarix elmlər namizədi Vəkil Həsənov “Heydər Əliyev müstəqil Azərbaycanın dövlət quruculuğunun banisidir”, Mədəniyyət İşçiləri Müstəqil HİRK-in sədri Cəmilə Səttarova “Heydər Əliyev və Azərbaycanda gender bərabərliyi”, Neft və Qaz Sənayesi İşçiləri HİRK-nin sədri Cahangir Əliyev “Heydər Əliyev və Azərbaycanın neft strategiyası”, “Kənd Qida İş” Hİ Federasiyasının sədri Tofiq Quliyev “Regionların sosial-iqtisadi inkişafı Dövlət Proqramı”nın həyata keçirilməsində həmkarlar ittifaqlarının rolu”, Dövlət İdarələri və İctimai Xidmət İşçiləri HİMK-in sədr müavini Əbülfəs Mehdiyev “Heydər Əliyevin iqtisadi islahatlarında sosial yönümlülük” mövzularında məruzələr etmişlər.
Maraqla qarşılanan məruzə və çıxışlarda vurğulanmışdır ki, ümummilli lider Heydər Əliyevin qətiyyəti, dərin zəkası və titanik fəaliyyəti ilə əbədi müstəqillik qazanmış Azərbaycanın qüdrəti və nüfuzu Prezident İlham Əliyevin yeritdiyi uğurlu daxili və xarici siyasət nəticəsində getdikcə artır. Azərbaycanda demokratiyanın inkişafı, işsizliyin aradan qaldırılması, yoxsulluğun səviyyəsinin azaldılması, regionların inkişafı istiqamətində mühüm işlər görülmüş, neft gəlirləri ölkənin sosial-iqtisadi inkişafına yönəldilmişdir. Bakı-Tbilisi-Ceyhan, Bakı-Tbilisi-Ərzurum, Bakı-Tbilisi-Qars layihələri Azərbaycanı regionda lider dövlətə çevirmişdir.
Məruzəçilər birmənalı şəkildə bəyan etmişlər ki, Prezident İlham Əliyevin siyasi kursu bundan sonra da dəstəklənəcəkdir. Bildirilmişdir ki, xalq, eləcə də onun ayrılmaz tərkib hissəsi olan həmkarlar ittifaqlarının çoxsaylı üzvləri qarşıdan gələn prezident seçkilərində də ulu öndər Heydər Əliyev siyasi xəttinin layiqli davamçısı İlham Əliyevə böyük inamla səs verəcəklər.
######
Bölmənin digər xəbərləri
