Ümummilli Liderin və akademik Zərifə Əliyevanın 100 illik yubileylərinə həsr olunan tədbir
Bakı, 4 may, AZƏRTAC
Elm və Təhsil Nazirliyinin Polimer Materialları İnstitutunda Ümummilli Lider Heydər Əliyev və akademik Zərifə Əliyevanın 100 illik yubileylərinə həsr olunmuş tədbir keçirilib.
Bu barədə AZƏRTAC-a institutdan məlumat verilib.
Tədbirdə institutun baş direktoru, AMEA-nın müxbir üzvü Bəxtiyar Məmmədov Ulu Öndər Heydər Əliyev və akademik Zərifə xanım Əliyevanın zəngin həyat və fəaliyyətlərindən danışıb.
İnstitutun elmi katibi dosent Solmaz Rzayeva Ulu Öndər Heydər Əliyevin müasir müstəqil Azərbaycan dövlətinin qurulmasında və inkişafında müstəsna xidmətlərini vurğulayıb. Qeyd olunub ki, ölkəmizdə qazanılan bütün nailiyyətlər Heydər Əliyev siyasətinin bəhrəsidir.
İnstitutun icraçı direktoru dosent Kazım Quliyev, professor Valeh Cəfərov, dosent Tahir Alxazov dahi rəhbər Heydər Əliyevin elm və təhsilin inkişafına xüsusi önəm verdiyini diqqətə çatdırıblar. Qeyd olunub ki, Ulu Öndərin ölkəmizə rəhbərliyi dövründə Sumqayıt sənayesinin modernləşdirilməsi, müəssisələrin bir çoxunun yenidən qurulması, onların müasir texnika və texnologiya ilə təmin edilməsi sahəsində uğurlu tədbirlər həyata keçirilib, kimya istehsalat müəssisələri yaradılıb.
Beynəlxalq əlaqələr və qrant layihələri şöbəsinin müdiri Esmira İmanova görkəmli oftalmoloq-alim, akademik Zərifə xanım Əliyevanın tibb elminin inkişafında xidmətlərindən, apardığı uğurlu tədqiqatlardan, qazandığı elmi nailiyyətlərdən, işləyib-hazırladığı effektli müalicə metodlarından bəhs edib.
Sonda videoçarx nümayiş olunub.
Bölmənin digər xəbərləri
