ÜST: Həftə ərzində koronavirusa yoluxma hallarının sayı 11 faiz azalıb
Bakı, 2 iyun, AZƏRTAC
Ötən həftə ərzində 3,3 milyondan çox adam koronavirus infeksiyasına yoluxub, 9 mindən çox adam bu səbəbdən vəfat edib. Mayın 23-dən 29-dək yoluxma hallarının sayı əvvəlki yeddi günün göstəricisi ilə müqayisədə 11 faiz, ölüm hallarının sayı 3 faiz azalıb.
AZƏRTAC xəbər verir ki, bu məlumatlar Ümumdünya Səhiyyə Təşkilatının (ÜST) həftəlik bülletenində əks olunub.
Əvvəlki həftə (16-22 may) ilə müqayisədə yoluxma hallarının ən ciddi azalması Afrikada (36 faiz) və Avropada (30 faiz) qeydə alınıb. Eyni zamanda, xəstəliyin artması Amerikada 9 faiz və Şərqi Aralıq dənizi bölgəsində 1 faiz olub. Ölüm hallarının azalması Şərqi Aralıq dənizi bölgəsində 45 faiz, Avropada 22 faiz və Cənub-Şərqi Asiyada 15 faiz olub. Lakin Qərbi Sakit okean regionunda ölüm hallarının sayı 18 faiz, Afrikada 15 faiz, Amerikada 13 faiz artıb.
Həftə ərzində ən çox yoluxma halları ABŞ-da qeydə alınıb (736.298). Sonrakı yerləri Çin (576.367), Avstraliya (294.128), Yaponiya (203.365) və Almaniya (183.844) tutur. Yeddi gün ərzində ən çox ölüm halları ABŞ-da qeydə alınıb (2.461). Sonrakı yerləri Braziliya (826), İtaliya (624), Rusiya (605) və Çin (578) tutur.
Bölmənin digər xəbərləri
