ÜST meymunçiçəyi virusu ilə bağlı beynəlxalq səhiyyədə fövqəladə vəziyyət statusunu dəyişməyib
Cenevrə, 2 noyabr, AZƏRTAC
Meymunçiçəyi virusunun dünyanın bir çox ölkəsində yayılması bu virusla əlaqədar beynəlxalq səviyyədə səhiyyə fövqəladə vəziyyət statusunun dəyişməz saxlanması ilə nəticələnib.
AZƏRTAC xəbər verir ki, bu barədə qərar Ümumdünya Səhiyyə Təşkilatı (ÜST) tərəfindən verilib və beynəlxalq qurum müstəqil ekspertlər komissiyasının tövsiyələrinə qoşulub.
Bununla da bu virusla bağlı iyun ayında elan edilən beynəlxalq səviyyəli səhiyyə fövqəladə vəziyyət rəsmi olaraq qüvvədə saxlanılıb. Beynəlxalq qurumun epidemioloji vəziyyətlə bağlı qaydalarına görə, digər ölkələrə də sirayət edən “ciddi, qəfil, qeyri-adəti və əvvəlcədən proqnozlaşdırıla bilməyən” səhiyyə problemləri “beynəlxalq səviyyədə narahatlıq doğuran səhiyyə fövqəladə vəziyyəti” kimi sinifləndirilir və səhiyyə sahəsində ən yüksək həyəcan pilləsi hesab edilən bu cür hallarda hökumətlərə müvafiq tədbirlər görmək üçün çağırış edilir.
Qeyd edilməlidir ki, hazırda COVID-19 pandemiyası və poliomielit virusu ilə bağlı da beynəlxalq səviyyədə səhiyyə fövqəladə vəziyyət qüvvədədir.
ÜST tərəfindən bildirilib ki, meymunçiçəyinə qarşı qlobal mübarizədə uğurlar əldə olunub və infeksiyanın qarşısının alınmasında irəliləyiş var. Lakin infeksiyanın yayıldığı bir sıra ölkələrdə hələ də diaqnoz və müalicə vasitələri, eləcə də peyvəndlər çatışmır. Bununla yanaşı bu xəstəliyə yoluxanlara qarşı diskriminasiya halları da narahatlıq doğurur.
Elgün Niftəli
AZƏRTAC-ın xüsusi müxbiri
Cenevrə
Bölmənin digər xəbərləri
