ÜZÜM YIĞIMI DAVAM EDİR
Tovuz Rayon Ərazi Kənd Təsərrüfatı İdarəsindən AZƏRTAC-a bildirmişlər ki, üzümçülər mövsümün əvvəlindən bəri mövcud 303 hektar plantasiyadan 720 ton məhsul yığmışlar. Bu, ötən mövsümdə yığılmış məhsuldan 10 ton çoxdur. Rayonda məhsil yığımı davam edir.
Xatırladaq ki, vaxtilə Tovuzda mövcud olan 10 min hektar üzüm bağlarından 100 min tondan artıq məhsul toplanırdı və rayonda fəaliyyət göstərən 18 emal müəssisəsinə təhvil verilirdi.
Rayonda üzümçülüyün inkişafı ilə bağlı problemlər də vardır. Belə ki, bir hektar üzüm bağı salmaq sahibkara 9-10 min manata başa gəlir. Banklar isə krediti 25 faizə verirlər. Bundan əlavə, rayonda fəaliyyət göstərən emal müəssisələri texniki sort üzümün bir kiloqramını 20 qəpiyə alırlar. Bu isə məhsulun heç maya dəyərini belə ödəmir.
Buna baxmayaraq, gəlirli sahəni inkişaf etdirmək üçün Tovuzda kifayət qədər torpaq sahəsi və işçi qüvvəsi vardır. Əgər sahibkarlara aşağı faizlə kreditlər verilərsə, sərfəli satış bazarı olarsa rayonda üzümçülüyün şöhrətini qaytarmaq çətin olmaz.
Bölmənin digər xəbərləri
