VALYUTADƏYİŞMƏ MƏNTƏQƏSİNİN İŞÇİSİNƏ SİLAHLI HÜCUM OLMUŞDUR
Avqustun 12-də Bakı şəhərinin Bəşir Səfəroğlu küçəsindəki 184 nömrəli binada yerləşən valyutadəyişmə məntəqəsinin işçisi, 48 yaşlı Alıyev Pirqələm Tapdıq oğluna silahlı hücum olmuşdur. Dərhal hadisə yerinə gələn Bakı Şəhər Baş Polis İdarəsinin rəisi, general-leytenant Məhərrəm Əliyev AZƏRTAC-ın müxbirinə bildirmişdir ki, Pirqələm Alıyev səhər saat 11 radələrində əlində pul çantası ilə işə gələrkən Səhiyyə Nazirliyi binasının yaxınlığında ona hücum olmuş, cinayətkar “Makarov” tipli əldədüzəltmə tapançadan atəş açaraq çantanı onun əlindən almışdır. Lakin Pirqələm Alıyev yaralı vəziyyətdə onun arxasınca qaçaraq çantanı geri ala bilmişdir. Cinayətkar isə tapançanı hadisə yerində qoyaraq qaçmışdır. Hadisəni törədən şəxsin tutulması üçün operativ əməliyyat tədbirinə başlanmışdır. Qarın nahiyyəsindən ciddi yaralanmış zərərçəkən Musa Nağıyev adına xəstəxanaya yerləşdirilmişdir. Hazırda onun vəziyyəti ağırdır. Hadisənin şahidi olanlar var. Fakt üzrə cinayət işi açılmışdır, istintaq gedir.
Ümumiyyətlə, ölkəmizin paytaxtında sabitlik hökm sürür və baş verən cinayət faktları azalmışdır. Hüquq mühafizə orqanları Bakıda ictimai asayişə ciddi nəzarət edirlər.
Bölmənin digər xəbərləri
