Vaşinqton, 15 noyabr (AZƏRTAC). Noyabrın 14-də Azərbaycanın ABŞ-dakı səfirliyində Xarici Siyasət üzrə Gənc Mütəxəssislər Qrupu ilə görüş keçirilmişdir.

Görüşdə çıxış edən səfir Elin Süleymanov Azərbaycanın dövlətçilik ənənələrindən, Azərbaycan Xalq Cümhuriyyətinin fəaliyyətindən, Şərqdə ilk parlamentin, qadınlara seçki hüququnun verilməsindən danışmışdır. Müstəqilliyinin bərpasından keçən 22 il ərzində Azərbaycanın beynəlxalq arenada nüfuzunun daha da gücləndiyini bildirən səfir Azərbaycanın BMT Təhlükəsizlik Şurasının qeyri-daimi üzvlüyünə seçilməsinin buna bariz nümunə olduğunu qeyd etmişdir.

Bildirilmişdir ki, Azərbaycan çox uğurlu enerji diplomatiyası həyata keçirir. E.Süleymanov ölkəmizin etibarlı müttəfiq kimi xarakterizə edilməsində ölkə rəhbərliyinin götürdüyü öhdəliklərə sadiqliyinin əsas rol oynadığını vurğulamış və hazırda gündəmdə olan enerji layihələri, xüsusilə TANAP layihəsi barəsində məlumat vermişdir.

Azərbaycanın coğrafi reallıqlarının ölkənin xarici siyasət istiqamətlərinin formalaşmasında həlledici amil olduğunu vurğulayan səfir əsası ümummilli lider Heydər Əliyev tərəfindən qoyulmuş praqmatik xarici siyasət kursunun Prezident İlham Əliyev tərəfindən uğurla davam etdirildiyini diqqətə çatdırmışdır. Qeyd olunmuşdur ki, Azərbaycanın öz qonşuları, xüsusilə Türkiyə və Gürcüstanla nümunəvi münasibətləri vardır. Ermənistan-Azərbaycan, Dağlıq Qarabağ münaqişəsi regional inteqrasiya üçün əsas maneədir. Münaqişənin ədalətli həlli və fəsadlarının aradan qaldırılması istiqamətində Azərbaycan hökumətinin həyata keçirdiyi tədbirlər barəsində məlumat verilmişdir.

Azərbaycanın mədəniyyətlər və dinlərarası dialoq üçün əlverişli platforma olduğunu bildirən səfir ölkəmizdə tarixən formalaşmış milli və etnik azlıqlar arasında dost münasibətlərdən və tolerantlığın xalqımızın fəxr ediləsi cəhətlərindən biri olduğunu vurğulamışdır.

Qeyd edək ki, 2004-cü ildə təsis edilmiş Xarici Siyasət üzrə Gənc Mütəxəssislər Qrupunun London və Brüsseldə də ofisləri fəaliyyət göstərir.

Qrupun üzvləri sırasına ABŞ-ın müxtəlif dövlət orqanlarında, eləcə də konqresmenlərin ofislərində çalışan gənclər daxildir.

Yusif Babanlı

AZƏRTAC-ın xüsusi müxbiri

Vaşinqton