Vəkillər Kollegiyasının Vətən müharibəsində Böyük Qələbəyə həsr olunmuş onlayn konfransı keçirilib
Bakı, 29 dekabr, AZƏRTAC
Azərbaycan Respublikası Vəkillər Kollegiyası Prezident, Müzəffər Ali Baş Komandan İlham Əliyevin rəhbərliyi ilə Vətən müharibəsində Böyük Qələbəyə həsr olunmuş onlayn konfrans təşkil edib.
Vəkillər Kollegiyasından AZƏRTAC-a bildiriblər ki, konfransda respublikada fəaliyyət göstərən bütün vəkil qurumlarının rəhbər şəxsləri və fərdi vəkillər iştirak ediblər.
Kollegiyanın sədri Anar Bağırov Müzəffər Ali Baş Komandan İlham Əliyevin rəhbərliyi ilə Vətən müharibəsində xalqımızın Böyük Qələbəsi münasibətilə iştirakçıları təbrik edib. Anar Bağırov Vəkillər Kollegiyasının yeddi üzvünün könüllü şəkildə Vətən müharibəsinə iştirak etdiyini vurğulayaraq bildirib ki, onlardan bir neçəsi dövlətimizin başçısının sərəncamları ilə “Cəsur döyüşçü” və "Cəbrayılın azad olunmasına görə" medalları ilə təltif olunublar.
Qeyd edilib ki, dövlətimizin başçısının müvafiq fərman və sərəncamları ilə məhkəmə-hüquq sahəsində aparılan islahatlar vəkilliyin nüfuzunun artmasına səbəb olub. Prezident İlham Əliyevin 2018-ci il fevralın 22-də imzaladığı “Azərbaycan Respublikasında vəkilliyin inkişafı ilə bağlı əlavə tədbirlər haqqında” Sərəncamı ölkəmizdə vəkillik fəaliyyətinin inkişafına mühüm təkan verib. Dövlətimizin başçısının “Məhkəmə-hüquq sistemində islahatların dərinləşdirilməsi” haqqında 2019-cu il 3 aprel tarixli Fərmanına və “Mediasiya haqqında” Azərbaycan Respublikası Qanununa uyğun olaraq Mediasiya Şurasının təsis edilməsi ilə bağlı işçi qrup yaradılıb. Bu çərçivədə ölkəmizin tarixində ilk dəfə olaraq yaradılmış Mediasiya Şurasının iki təsisçisindən biri kimi Sahibkarlar (İşəgötürənlər) Təşkilatları Milli Konfederasiyası ilə bərabər Vəkillər Kollegiyası çıxış edib.
Anar Bağırov diqqətə çatdırıb ki, qarşıda Qarabağ bölgəsində yeni vəkil qurumlarının yaradılması kimi şərəfli vəzifə dayanır. Doğma torpaqlarına qayıdacaq vətəndaşlarımıza keyfiyyətli hüquqi yardım göstərilməli, onların hüquqi yardıma çatımlılığı təmin edilməlidir. Vəkillik bu vəzifəni də ən qısa zamanda yerinə yetirəcək. Beləliklə, Vəkillər Kollegiyası illər boyu hüquqi yardıma çatımlılığın təmin olunmadığı ərazilərimizdə fəaliyyət göstərəcək. Artıq Qarabağ vəkil bürosu yaradılıb və o, Şuşada yerləşəcək. Biz çalışacağıq ki, həmin qurumun fəaliyyətinin təşkili üçün bütün lazımi səyləri göstərək.
Konfransda, həmçinin andiçmə mərasimi də keçirilib. Vətən müharibəsində iştirak edən, ordudan yeni tərxis olunan və “Cəbrayılın azad olunmasına görə” medalı ilə təltif edilən namizəd Elvin Məhərrəmov vəkil andı içərək vəkilliyə qəbul olunub.
Həmçinin Anar Bağırov Ermənistanın təxribatı nəticəsində başlanmış Vətən müharibəsi ilə bağlı Vəkillər Kollegiyasının özündə hüquqi və faktiki əsasları ehtiva edən ingilis və rus dillərində hazırlanmış hesabat xarakterli iki müraciətin beynəlxalq hüquq-müdafiə təşkilatları, xarici ölkələrin vəkillər kollegiyaları və hüquq cəmiyyətləri daxil olmaqla, 230 beynəlxalq təşkilata və ali qurumların 40 səlahiyyətli şəxsinə göndərildiyini, Ermənistanın həyata keçirdiyi ekoloji və mədəni terrora qiymət verilməsinə və bu hərəkətlərin kəskin şəkildə qınanılmasına çağırdığını vurğulayıb. Məlumat verilib ki, münaqişənin başlandığı ərəfədə bir sıra ölkələrin Vəkillər kollegiyaları ölkəmizin haqq işində dəstək müraciətləri göndərib. Hətta həmin təşkilatlar münaqişədən zərər çəkmiş soydaşlarımıza maddi dəstək göstərilməsi barədə niyyətlərini bəyan ediblər.
Kollegiya sədri vurğulayıb ki, son bir ildə regionlarda iki, paytaxtda səkkiz yeni vəkil qurumu fəaliyyətə başlayıb və ölkə üzrə vəkil qurumlarının sayı 100-ə çatıb. Son üç ildə üç regional vəkil bürosu yaradılıb.
Daha sonra ixtisas komissiyasının sədri Ramiz İbrahimov, Hüquqi Yardım və Tədris Mərkəzinin direktoru, Vəkillərin İntizam Komissiyasının sədri Şahmar Məmmədov, Vəkillər Kollegiyası Rəyasət Heyətinin Aparatının rəhbəri Bayram Orucov və başqaları çıxış ediblər.
Tədbirdə, eləcə də “Vəkillərin davranış qaydaları haqqında” Əsasnaməyə əlavə və dəyişikliklər müzakirə olunub. Müzakirədə konfrans iştirakçılarının dəyişikliklərlə bağlı sual və təklifləri cavablandırılıb. Yekunda təklif edilən dəyişikliklər qəbul olunub.
Eyni zamanda, Vəkillər Kollegiyasının üzvü Elçin Usubun Vəkillər Kollegiyası Rəyasət Heyətinə, Abbas Kərimbəylinin isə Vəkillərin intizam komissiyasına üzvlüyü məsələsi səsə qoyularaq qəbul edilib.
Bundan başqa, digər mühüm məsələlər ətrafında da fikir mübadiləsi aparılıb və Rəyasət Heyətinin üç illik hesabatı vəkillərə təqdim olunub.
Bölmənin digər xəbərləri
