VERGİDƏN YAYINANLARA QARŞI SƏRT TƏDBİRLƏR GÖRÜLÜR
Vergilər Nazirliyinə Xocahəsən-Lökbatan yolunun kənarında fiziki şəxs Cəmil Qurban oğlu Qazıyevə məxsus istehsal və topdansatış obyektinin vergi orqanlarına təhrif olunmuş hesabat təqdim etməklə külli miqdarda vergilərdən yayınması barədə məlumat daxil olmuşdur.
Bununla bağlı 2006-cı il iyulun 7-də Vergilər Nazirliyinin Operativ Nəzarət İdarəsinin və Vergi Cinayətlərinin İbtidai Araşdırılması Departamentinin əməkdaşları həmin istehsal və topdansatış obyektində yoxlamalar keçirmiş, qara mühasibatlıq sənədləri götürmüş və aidiyyəti şəxslərin izahatlarını almışlar.
Müəyyən olunmuşdur ki, Cəmil Qazıyevin qeyd olunan ünvanda yerləşən və 1000 kvadratmetr sahəni əhatə edən anbarında uçotdan gizlədilən külli miqdarda Türkiyədən idxal olunmuş müxtəlif növ sanitariya texnikası avadanlığı saxlanılır, həmin mallar hər gün “KİA” markalı maşınlarla Bakı şəhəri ərazisinə daşınaraq satışı təşkil olunur, lakin bu fəaliyyət barədə vergi orqanlarına heç bir hesabat təqdim edilmir və vergidən yayınma hallarına yol verilir. Tədbir zamanı, həmçinin müəyyən edilmişdir ki, obyektdə Türkiyə Respublikasının “Beko” şirkətinin əmtəə nişanından istifadə etməklə qanunsuz yolla ölkəyə idxal edilmiş müxtəlif diametrli borular istehsal edə bilən avadanlıq mövcuddur və burada gizli şəkildə boru istehsal edilərək Türkiyə istehsalı olan məhsul adı altında daxili bazarda satılır.
Aydın olmuşdur ki, C.Qazıyevin direktoru olduğu “Beka-K” MMC-nin adından Türkiyədə çap olunmuş saxta qaimələrdən istifadə etməklə anbarda saxlanılan malların alqı-satqısı əməliyyatları həyata keçirilir, lakin vergi orqanlarına həmin MMC-nin fəaliyyətinin olmadığı barədə yalan hesabatlar təqdim edilir.
Vergi Nazirliyi tərəfindən, həmçinin vergidən yayınma faktlarına dair daxil olmuş məlumatların araşdırılması məqsədi ilə bu il iyulun 6-da fiziki şəxs Qulu Cəfərqulu oğlu Bayramovun rəhbərlik etdiyi və məişət naqilləri və güc kabellərinin istehsalı ilə məşğul olan “Günəş” firmasının istehsal sexlərində və anbarlarında yoxlamalar keçirilmiş, qara mühasibatlıq sənədləri götürülmüş və aidiyyəti şəxslərin izahatları alınmışdır.
Tədbir zamanı müəyyən edilmişdir ki, “Günəş” firmasının 0,6 hektara yaxın ərazisinin 2 istehsal sexində 20-22 nəfərə yaxın fəhlə və qulluqçu, 2 xətli dəzgah, 20 sarıyıcı dəzgah, yuk avtomaşını və s. texnika işlədilir. Hər ay təxminən 100-150 mlyon manatlıq müxtəlif naqil və kabellər istehsal edilərək metri 290-7000 manata nağd satılır, dövriyyənin əksər hissəsi mühasibat sənədlərində öz əksini tapmır, ambarlarda 250 top müxtəlif növ hazır məhsul, həmçinin Rusiyanın “MKM” ticarət markası ilə markalanmış 29 top naqil aşkar edilmişdir. Aydın olmuşdur ki, müəssisə vergi orqanlarına cüzi miqdarda vergi ödəyir, öz dövriyyələri barədə təhrif olunmuş məlumatlar verir və külli miqdarda vergilərdən yayınır. Bu zaman nağd hesablaşma qaydalarının polzulması, işçilərlə əmək müqavilələrinin bağlanmaması və digər qanun pozuntularına da yol verilir.
Vergilər Nazirliyinin əməkdaşları “Günəş” firmasının müvafiq sənədləşmələr aparmadan satış məqsədi ilə mal verdiyi bir sıra mağazarlarda da tədbirlər keçirmişlər.
Bu həftə, həmçinin vergilərdən yayınma faktlarının aşkar edilməsi üzrə daş karxanalarında aparılan operativ nəzarət tədbirləri də davam etdirilmişdir.
Qaradağ rayonunun Qızıldaş qəsəbəsində yerləşən tikinti daşının tədarükü, hazırlanması və satışını həyata keçirən “Həsən Ə.Ş.” firması (rəhbəri Şirinov Ələsgər Əbdülhüseyn oğlu) və “Elmir” kiçik müəssisəsinin (rəhbəri Şahbazov Zeynəlxan Mürvət oğlu) vergi orqanlarına təhrif olunmuş bəyannamələr verməklə vergilərdən yayınması barədə məlumat daxil olmuşdur.
Bununla bağlı Vergilər Nazirliyinin Operativ Nəzarət İdarəsinin və Vergi Cinayətlərinin İbtidai Araşdırılması Departamentinin əməkdaşları tərəfindən hər iki firmanın ərazilərində yoxlamalar keçirilmiş, qara mühasibatlıq sənədləri götürülmüş və aidiyyəti şəxslərin izahatları alınmışdır.
Tədbirlər zamanı müəyyən olunmuşdur ki, Ə.Şirinovun daş karxanasının 3 istehsal sahəsində 30-35 nəfərə yaxın fəhləsi və qulluqçusu, 5 ədəd daşkəsən kombaynı, 3 ədəd cığıraçan texnika, traktorlar və s. avadanlıq işlədilir. Hər gün təxminən 20.000-25.000 ədəd mişar kəsilərək “KAmaZ” markalı avtomaşınlarla, daşın birinin qiyməti 28-30 qəpiyə nağd satılır, sənədlərdə isə hər bir daşın qiyməti 12 qəpik göstərilməklə, dövriyyənin əksər hissəsi mühasibat sənədlərində öz əksini tapmır.
Oxşar hal “Elmir” kiçik müəssisəsinin obyektlərində də müəyyən olunmuşdur. Belə ki, Z.Şahbazovun daş karxanasının 3 istehsal sahəsində 20-25 nəfərə yaxın fəhlə və qulluqçu, 5 ədəd daşkəsən kombaynı, 3 ədəd cığıraçan texnika, traktorlar və s. avadanlıq işlədilir. Hər gün təxminən 15.000-20.000 ədəd mişar daşı kəsilərək avtomaşınlarla, hər bir daşın qiyməti 26-28 qəpiyə nağd satılır, sənədlərdə isə daşın hər birinin qiyməti 12 qəpik göstərilməklə, dövriyyənin əksər hissəsi mühasibat sənədlərində öz əksini tapmır.
Aydın olmuşdur ki, hər iki müəssisə vergi orqanlarına öz dövriyyələri barədə təhrif olunmuş məlumatlar vermiş, cüzi miqdarda vergi ödəmiş və külli miqdarda vergilərdən yayınmışlar. Bu zaman nağd hesablaşma qaydalarının pozulması, işçilərlə əmək müqavilələrinin bağlanmaması və digər qanun pozuntularına da yol verilmişdir.
Qeyd olunan bütün faktlar üzrə yoxlamalar davam etdirilir və dövlət büdcəsinə vurulmuş ziyanın məbləği müəyyənləşdirilir.
Bölmənin digər xəbərləri
