Vergilər Nazirliyi yanında vergi cinayətlərinin ibtidai araşdırılması departamentində 146 cinayət işi başlanmışdır
Bakı, 9 aprel (AZƏRTAC). 2014-cü ilin birinci rübü ərzində Vergilər Nazirliyi yanında vergi cinayətlərinin ibtidai araşdırılması departamentində vergi ödəməkdən yayınma, qanunsuz sahibkarlıq faktları üzrə 146 cinayət işi başlanmışdır.
Bu barədə AZƏRTAC-a nazirliyin analitik-informasiya şöbəsindən məlumat verilmişdir. Məlumatda bildirilir ki, cinayət işlərindən 29-u vergi ödəməkdən yayınma, 6-sı qanunsuz sahibkarlıq və vergi ödəməkdən yayınma, 2-si səyyar vergi yoxlamalarının nəticələrinə dair materiallar üzrə qanunsuz sahibkarlıq faktları, 108-i vergi borcunun ödənilməməsi barədə vergi orqanlarından daxil olmuş materiallar üzrə vergi ödəməkdən yayınma faktları, 1-i isə digər hüquq-mühafizə orqanlarından daxil olan materiallar üzrə qanunsuz sahibkarlıq faktı ilə bağlı başlanmışdır.
Hesabat dövründə departamentin istintaq idarəsində 66 cinayət işi üzrə ibtidai istintaq tamamlanmış, təqsirləndirilən 2 şəxs barəsində həbs qətimkan tədbiri seçilmişdir. Departamentdə cinayət işləri və materiallar üzrə aparılan araşdırmalar zamanı 2209,1 min manat dövlət büdcəsinə ödənilmişdir ki, bu da 2013-cü ilin eyni dövrü ilə müqayisədə 297,4 min manat çoxdur.
Cinayət işləri üzrə keçirilmiş istintaq-əməliyyat tədbirləri nəticəsində vergi cinayətləri törətdiklərinə görə barələrində axtarış elan edilmiş 4 nəfər şəxs tutularaq departamentin istintaq şöbəsinə təhvil verilmişdir. Habelə ibtidai istintaqdan yayınan 157 şəxsin məcburi qaydada, 31 şəxsin tapılaraq istintaqa gətirilməsi, 47 şəxsin isə yerinin müəyyən olunaraq istintaqa məlumat verilməsi təmin edilmişdir.
Bundan əlavə, vergi yoxlamalarından, əmlakının siyahıya alınmasından yayınan və fəaliyyəti barədə bəyannamə təqdim etməyən cəmi 87 vergi ödəyicisi tapılıb müvafiq vergi orqanlarına təqdim olunmuşdur.
Bölmənin digər xəbərləri
