VƏTƏNDAŞLARDAN NARKOTİK VASİTƏLƏR GÖTÜRÜLMÜŞ, YABANI HALDA BİTMİŞ ÇƏTƏNƏ KOLLARI MƏHV EDİLMİŞDİR
Daxili İşlər Nazirliyinin mətbuat xidmətindən AZƏRTAC-a bildirmişlər ki, Nəsimi Rayon Polis İdarəsinin 22-ci bölməsi əməkdaşlarının keçirdikləri əməliyyat tədbirləri nəticəsində Müşfiqabad qəsəbəsinin sakini Seyran İsmayılovdan 0,242 qram heroin götürülmüşdür.
Suraxanı Rayon Polis İdarəsinin 31-ci bölməsi əməkdaşları əvvəllər məhkum olunmuş Canpolad Əhmədovdan 0,253 qram heroin müsadirə etmişlər.
Mingəçevir Şəhər Polis Şöbəsi əməkdaşlarının keçirdikləri əməliyyat tədbirləri nəticəsində şəhər sakini, əvvəllər məhkum olunmuş Vaqif Mürşüdovdan 0,21 qram heroin götürülmüşdür. V.Mürşüdovun narkotik vasitəni həmyerlisi Ruslan Məmmədovdan alması müəyyən edilmişdir.
Faktlarla bağlı cinayət işi açılmışdır.
Ağstafa Rayon Polis Şöbəsinin və Dövlət Sərhəd Xidmətinin əməkdaşları tərəfindən Sadıxlı kəndində yabanı halda bitmiş, çəkisi 7264 kiloqram olan 9186 ədəd, Nizami Rayon Polis Şöbəsinin (Gəncə) əməkdaşları tərəfindən Gəncə çayının kənarında yabanı halda bitmiş, çəkisi 670 kiloqram olan 2317 ədəd çətənə kolu yığılaraq məhv edilmişdir.
Bölmənin digər xəbərləri
