Bakı, 16 sentyabr, AZƏRTAC

Ölkəmizdə beynəlxalq standartlara uyğun auditin, o cümlədən dövlət auditinin zəruri hüquqi bazası yaradılıb.

AZƏRTAC xəbər verir ki, bunu Hesablama Palatasının sədri Vüqar Gülməmmədov Auditorlar Palatasının təşkilatçılığı ilə keçirilən “Yaşıl iqtisadiyyat zəminində hesabatlılıq və şəffaflıq” mövzusunda beynəlxalq elmi-praktik konfransda çıxışı zamanı bildirib.

Onun sözlərinə görə, hazırda auditin artan əhəmiyyəti dünyada müxtəlif platformalarda qeyd olunur.

“Hesab edirəm ki, iştirakçısı olduğumuz konfrans timsalında tədbirlərin təşkil edilməsi audit institutun əhəmiyyətinin daha da artırılmasında, bu sahədə davamlı islahatların keçirilməsində və bununla da maliyyə sektorunda nizam-intizamın möhkəmlərdirilməsində önəmli rol oynaya bilər. İlk olaraq, hesabatlılığın ən əsas göstəricilərindən olan auditlərin sayı barədə bildirmək istəyirəm ki, son illərdə bu göstəricidə əhəmiyyətli artım müşahidə edilir. 2021-ci ildə audit portfelinin 54 faizi açıqlanırdısa, 2022-ci ildə bu göstərici 60 faizə, 2023-cü ildə isə 64 faizə yüksəlib. 2025-ci il üzrə isə bu nisbətin 70 faizə yüksəldilməsini hədəfləyirik. Həm beynəlxalq standartların, həm də milli qanunvericiliyin tələblərinə əsasən bütün auditlərin nəticələri parlamentə təqdim edilir”, - deyə palata sədri qeyd edib.

V. Gülməmmədov vurğulayıb ki, ümumbəşəri problemlərdən biri də iqlim problemidir: “İqlim dəyişikliklərinin təsirlərinin azaldılması və bu təsirlərə uyğunlaşma üçün fəaliyyətlərə əhəmiyyətli dövlət resurslarının cəlb olunması, prosesə milli hökumət əsaslı yanaşmanın tələb olunması bu sahəni Ali Audit Orqanı (AAO) obyektinə çevirir. Belə ki, son 5 ildə dünyada iqlim fəaliyyətinin qiymətləndirilməsi üzrə 50-dən çox audit aparılıb. Ətraf mühitlə bağlı məsələlər uyğunluq və maliyyə auditləri ilə əhatə edilə bilsə də, iqlim dəyişikliyi ilə bağlı audit mövzularında səmərəlilik auditi ön plana çıxır. Cari ildə də iqlim sahəsi üzrə auditlər davam etdirilməkdədir. Mövzular arasında Kür-Araz ovalığında kollektor-drenaj sistemləri və suvarılan torpaqların deqradasiyasına qarşı mübarizə üzrə fəaliyyətin auditi, təhlükəsiz tullantıların idarə olunmasının səmərəliliyinin və nəticəliliyinin qiymətləndirilməsinin auditini, işğaldan azad edilmiş ərazilərdə yaşıl iqtisadiyyata töhfəsi olan “ağıllı kənd” layihəsinin auditini qeyd edə bilərəm. Aparılmış auditlər bu sahə üzrə bir sıra çağırışların olduğunu göstərir. Bunlardan bəziləri bizim ölkəyə, bəziləri isə bütün ölkələrə aid ola bilər. İqlim skaneri aləti 100-dən çox AAO tərəfindən iqlim dəyişikliyinin qarşısının alınması istiqamətində hökumət tərəfindən görülən işlərin, milli və beynəlxalq səviyyədə qəbul edilmiş öhdəliklərin icrası vəziyyətinin 3 istiqamət (idarəetmə, maliyyə və dövlət siyasəti) üzrə qiymətləndirilməsini nəzərdə tutur”.

V. Gülməmmədov onu da diqqətə çatdırıb ki, hazırda müxtəlif AAO-lar, o cümlədən Hesablama Palatası tərəfindən aparılan qiymətləndirmənin nəticələri ictimailləşdirilməsi üçün müvafiq sistemə daxil edilir və nəticələrin COP29-da açıqlanması nəzərdə tutulur.