Vyana balının təşkilatçısı: Layihə ölkələr arasında dostluğu möhkəmləndirir və işgüzar əlaqələri inkişaf etdirir
Bakı, 10 fevral, G. Alıyeva, foto- S. Məcnun, AZƏRTAC
Təşkilatçılar üçün Vyana xeyriyyə balının sadəcə mədəni və sosial tədbirdən kənara çıxması çox vacibdir. Xeyriyyəçilik və gənc nəsildə estetikanın inkişafı tədbirin ayrılmaz hissəsi olaraq qalsa da, eyni dərəcədə vacib bir məqsəd balı işgüzar ünsiyyət və şəbəkələşmə üçün güclü, mötəbər platformaya çevirməkdir.
Bu barədə AZƏRTAC-ın müxbirinə Vyana xeyriyyə balının təşkilatçısı Svetlana Tretyakova bildirib. Onun sözlərinə görə, builki tədbirin üç günə qədər genişləndirilməsinin səbəbi də məhz bu amillərdir.
“Biz Ukrayna, Milan və Vyanadan biznes nümayəndələrini qəbul edirik. Həm dövlət qurumları, həm də sahibkarlarla bir sıra görüşlər planlaşdırılır. Proqrama çoxsaylı B2B görüşləri, mətbuat konfransları və əlbəttə ki, Vyana xeyriyyə balının özü daxildir”, - deyə o qeyd edib.
Svetlana Tretyakova açıqlamasının sonunda layihənin ölkələr arasında dostluq körpülərini gücləndirməklə yanaşı, həm də işgüzar əlaqələrin inkişafına əlavə təkan verəcəyinə əminliyini ifadə edib.
Bölmənin digər xəbərləri
