VYANADA BEYNƏLXALQ ATOM ENERJİSİ AGENTLİYİ BAŞ KONFRANSININ 52-Cİ İCLASI İŞƏ BAŞLAMIŞDIR
AZƏRTAC-ın xüsusi müxbiri xəbər verir ki, sentyabrın 29-da Vyanada Beynəlxalq Atom Enerjisi Agentliyi (BAEA) Baş Konfransının 52-ci iclası öz işinə başlamışdır.
Oktyabrın 4-dək davam edəcək iclasda agentliyə üzv olan 140-dan artıq ölkənin nümayəndələri iştirak edirlər.
İclasda ölkəmizi Azərbaycan Milli Elmlər Akademiyasının prezidenti, akademik Mahmud Kərimovun rəhbərlik etdiyi nümayəndə heyəti təmsil edir. Nümayəndə heyətinə Nazirlər Kabineti, Fövqəladə Hallar Nazirliyi, Dövlət Gömrük Komitəsi, Ekologiya və Təbii Sərvətlər Nazirliyinin təmsilçiləri və Azərbaycanın Avstriyadakı səfirliyinin əməkdaşları daxildirlər.
BAEA Baş Konfransının gündəliyində nüvə tədqiqatları və yeni texnologiyalar, nüvə təhlükəsizliyi, agentliyə yeni üzvlərin qəbul edilməsi və digər cari məsələlər dayanır.
Baş Konfransın sentyabrın 30-da keçiriləcək geniş iclasında Azərbaycan nümayəndə heyətinin rəhbəri, akademik M.Kərimov milli məruzə ilə çıxış edəcəkdir.
Bölmənin digər xəbərləri
