WUF13: Yeni urbanizasiya və milli prioritetlər – Bakıda keçirilən beynəlxalq tədbirin əhəmiyyətindən danışılıb
Bakı, 22 may, AZƏRTAC
"WUF-13: Yeni urbanizasiya və milli prioritetlər" mövzusunda onlayn tədbir keçirilib.
AZƏRTAC xəbər verir ki, tədbiri "Müasir İnkişaf" İctimai Birliyi təşkil edib. Birliyin sədri Mübariz Göyüşlü Ümumdünya Şəhərsalma Forumunun 13-cü Sessiyasının (WUF13) COP29-dan sonra Azərbaycanın gerçəkləşdirdiyi ən qlobal tədbir olduğunu bildirib. O, rəhbərlik etdiyi təşkilatın daim bu mövzulara həsr olunan tədbirlər keçirdiyini açıqlayıb. Mübariz Göyüşlünün sözlərinə görə, bu tədbir vasitəsilə Azərbaycan urbanizasiya məsələsində gördüyü işləri təqdim edib və bu mövzuda faydalı müzakirələrin açıldığı meydana çevrilib. Əvvəllər Qarabağ problemindən bəhs edən Azərbaycanın hazırda orada abadlıq işləri gördüyünü deyən birlik sədri ölkənin nail olduğu inkişaf səviyyəsinə toxunub.
Millət vəkili, professor Vüqar Rəhimzadə dünyanın diqqətinin Azərbaycanda olduğunu vurğulayıb. Onun sözlərinə görə, Azərbaycanın şəhərsalma sahəsində çox böyük təcrübəsi var. O, WUF13 tədbirinin Azərbaycanın təşkilatçılıq bacarığını, regionda və dünyada söz sahibi olduğunu göstərdiyini qeyd edib. Millət vəkili Qarabağda və Şərqi Zəngəzurda quruculuq, abadlıq istiqamətində mühüm işlər görüldüyünü qeyd edib. Deputat Bakıda keçirilən tədbirin diqqəti şəhərsalma sahəsindəki qlobal problemlərə yönəltdiyini diqqətə çatdırıb.
Millət vəkili Aydın Hüseynov deyib ki, WUF13-ə qatılan ölkələrin və iştirakçıların sayı tədbirin əhəmiyyətini bariz şəkildə göstərib. O, WUF13-ün Bakıda keçirilməsinin Azərbaycan Prezidenti İlham Əliyevin dünyadakı nüfuzu və dövlətin iqtisadi inkişaf səviyyəsi ilə bağlı olduğunu vurğulayıb. Deputat bildirib ki, həm Bakı, həm də digər şəhərlərimiz tarixi İpək Yolu üzərində yerləşib, bütün bunlardan çıxış edərək isə Azərbaycanın şəhərsalma sahəsində böyük təcrübəsinin, mədəni dəyərlərinin olduğunu söyləmək mümkündür. Çıxışçı süni intellekt sahəsində də Azərbaycanın məxsusi təcrübəsinin formalaşdığını bildirib. Millət vəkili Qarabağ və Şərqi Zəngəzurdakı tikinti, quruculuq işlərindən, Prezident İlham Əliyevin və Birinci vitse-prezident Mehriban Əliyevanın fəaliyyətindən də söz açıb.
Türkiyənin Üsküdar Universitetinin professoru, sosioloq Əbülfəz Süleymanlı deyib ki, bugünkü şəhər və şəhərsalma anlayışı dəyişməkdədir. O, bildirib ki, şəhər insanı formalaşdıran sosial mühitdir: “Buna görə də şəhərsalmaya yalnız memarlıq kimi yox, insanyönümlü bir məsələ kimi də baxmaq lazımdır. Sağlam şəhər sağlamlıq infrastrukturu olan şəhər kimi yox, hərəkətə təşviq edən, ictimai nəqliyyatı effektiv təmin edən, yaşıllığı qoruyan bir anlayışdır, həm də Azərbaycan, Bakı üçün də bu aktuallıq kəsb edir”.
Ə.Süleymanlı şəhərlərdə əhalinin məşğulluq imkanlarının da mühüm bir amil kimi nəzərdən keçirildiyini deyib.
Elm və Təhsil Nazirliyinin İqtisadiyyat İnstitutunun şöbə müdiri, professor Rəsmiyyə Sabir WUF13-ün keçirilməsinin Azərbaycan iqtisadiyyatına qısamüddətli və uzunmüddətli təsirlərdən söz açıb. O, diqqətə çatdırıb ki, xidmət sektorunda, xüsusilə də ticarət, ictimai iaşə, əyləncə sahələrində canlanma müşahidə olunur. Onun sözlərinə görə, qonaqların Azərbaycanla tanışlığı ictimai və konqres turizminin inkişafına töhfə verir. Uzunmüddətli təsirdən söz açan professor gələcəkdə investisiya mühitinin daha da yaxşılaşmasına müsbət təsirlərin olacağını qeyd edib.
Tədbirdə çıxış edən digər natiqlər də WUF13-ün əhəmiyyətindən danışıblar. Onlar gələcəkdə də bu cür tədbirlərin təşkil edilməsinin vacib olduğunu bildiriblər.
Bölmənin digər xəbərləri
