Böyük Britaniyanın Baş naziri Kiyevdə Ukraynaya yeni dəstəyi açıqlayacaq
London, 24 avqust, AZƏRTAC
Böyük Britaniyanın Baş naziri Endi Börnhem vəzifəsinin icrasına başladıqdan sonra ilk xarici səfərini Ukraynaya edəcək.
AZƏRTAC BBC-yə istinadla xəbər verir ki, bu gün Kiyevə səfəri zamanı Baş nazir Ukraynanın öz uzaqmənzilli raketlərini istehsal edə bilməsi üçün müvafiq texniki məlumatların bu ölkəyə təqdim ediləcəyini açıqlayacaq. Böyük Britaniya hökuməti müdafiə sənayesi şirkəti MBDA-ya Fransanın “Scalp” uzaqmənzilli raketlərində istifadə olunan Britaniya komponentləri ilə bağlı məxfi məlumatların açıqlanmasına icazə verib. “Scalp” Böyük Britaniyanın “Storm Shadow” raketinin Fransa versiyasıdır.
Endi Börnhem səfər çərçivəsində Böyük Britaniya və Fransa tərəfindən sabiq Baş nazir Kir Starmerin dövründə yaradılmış “İstəklilər koalisiyası”nın iclasına ilk dəfə sədrlik edəcək. O, həmçinin Ukraynaya göstərilən dəstəyə görə Britaniya xalqına verilən mükafatı qəbul edəcək və ölkənin Müstəqillik Günü ilə bağlı tədbirlərdə iştirak edəcək.
Baş nazir səfər ərəfəsində bildirib ki, Ukraynanın müstəqilliyinin 35-ci ildönümündə bu ölkənin xalqı Böyük Britaniyanın onların yanında olduğuna əmin olmalıdır. O vurğulayıb ki, Londonun Kiyevə dəstəyi davam edəcək və Ukraynanın təhlükəsizliyi Böyük Britaniyanın təhlükəsizliyi ilə birbaşa bağlıdır.
Bölmənin digər xəbərləri
