XALQ ŞAİRİ SÜLEYMAN RÜSTƏMİN 100 İLLİK YUBİLEYİ QEYD EDİLMİŞDİR
respublikasında iftixar hissi ilə deyirik ki, bizim dövlət dilimiz, gözəl ana dilimiz, Azərbaycan dilimiz vardır və bu, müstəqilliyimizin rəmzidir. Dilimizi yaşadan, zənginləşdirən, gözəlləşdirən bizim yazıçılarımız, şairlərimiz, mədəniyyət xadimlərimiz olubdur.
Heydər Əliyev,
27 mart 1998-ci il.
AZƏRTAC xəbər verir ki, aprelin 21-də Heydər Əliyev adına Respublika Sarayında xalq şairi, Sosialist Əməyi Qəhrəmanı Süleyman Rüstəmin 100 illik yubileyi münasibətilə yubiley gecəsi keçirilmişdir.
Mərasim iştirakçıları əvvəlcə Sarayın foyesində görkəmli şairin ömür yoluna, yaradıcılığına həsr olunmuş sərgiyə baxdılar.
Mədəniyyət və turizm naziri Əbülfəs Qarayev yubiley gecəsini açaraq dedi ki, Prezident İlham Əliyevin Süleyman Rüstəmin anadan olmasının 100 illiyi ilə əlaqədar imzaladığı Sərəncama əsasən təşkil edilən bu tədbir xalqımızın öz sənətkarına əbədi hörmət və məhəbbətinin təzahürü, ölkəmizdə şeirə, ədəbiyyata, mədəniyyətə göstərilən dövlət qayğısının ifadəsidir. XX əsr Azərbaycan ədəbiyyatının görkəmli nümayəndəsi Süleyman Rüstəmin 100 illik yubileyinin respublikamızın bütün guşələrində qeyd edildiyini vurğulayan nazir, şairin vətənə, insana məhəbbət duyğuları ilə yoğrulan, daim nikbinlik, yaşamaq eşqi aşılayan poeziyasının bundan sonra da sevilə-sevilə oxunacağına inandığını bildirdi.
Yazıçılar Birliyinin sədri, xalq yazıçısı Anar böyük ustadın həyat və yaradıcılığından danışdı, onun ötən əsrin 20-ci illərində işıq üzü görən “Ələmdən nəşəyə” adlı lik kitabından başlanan yaradıcılıq yolunun müxtəlif mərhələlərindən, Süleyman Rüstəm poeziyasının əsas mövzularından bəhs etdi. İnsanlara sevgi, məhəbbət, incə hisslər, xoş duyğular aşılayan lirikası ilə yanaşı, Təbriz həsrətli və müharibənin ağrı-acılarını sənətkarlıqla, yüksək bədiiliklə təsvir edən şeirlərinin də həmişəlik ədəbiyyatımızın qızıl fonduna daxil olduğunu bildirdi, incə zövqlü liriklərindən biri olaraq, Səməd Vurğun, Rəsul Rza kimi qələm və məslək dostları ilə birlikdə Azərbaycan ədəbiyyatının inkişafındakı böyük xidmətlərini yada saldı.
Süleyman Rüstəmin onlarca şeirinə musiqi bəstələnmişdir. Muğam üstündə oxunan qəzəlləri insanlara xoş əhval-ruhiyyə bəxş edir. Süleyman Rüstəmin “Ana və poçtalyon”, “Gün o gün olsun ki...”, “Təbrizim”, “Şəhriyara məktub” və digər şeirləri dillər əzbəri olmuşdur və bu gün də gənclərdə vətənpərvərlik hissləri oyadır.
Şair “Çimnaz xanım yuxudadır”, “Qaçaq Nəbi” pyesləri ilə dramaturgiyamızda da öz sözünü demişdir. Hansı formada, ölçüdə, hətta çoxlarının dönə-dönə qələm işlətdiyi mövzuda belə yazırsa-yazsın, Süleyman Rüstəmin əsərlərində həmişə məhz onun yaradıcılığına məxsus nikbinlik, həyatsevərlik ruhu duyulur.
O, 1938-ci ildən ömrünün sonuna kimi Azərbaycan SSR Ali Sovetinin deputatı, 1971-ci ildən isə həm də Ali Sovetin sədri olmuş, Dövlət Dram Teatrının direktoru, “Ədəbiyyat və incəsənət” qəzetinin baş redaktoru, Yazıçılar İttifaqının sədri kimi vəzifələrdə həmişə özünü fəal ictimai-siyasi xadim, ədəbiyyyat və mədəniyyətimizin bacarıqlı təşkilatçısı kimi tanıtmış, hər zaman yeni ədəbi gəncliyin yetişməsinə qayğı və köməyini əsirgəməmişdir.
Şairlə bağlı xatirələrini danışan Anar Süleyman Rüstəmin zarafatcıl, şux, fəal insan, mehriban ailə başçısı, etibarlı dost olduğunu söylədi.
XX əsr Azərbaycan poeziyasında öz məktəbini yaratmış Süleyman Rüstəmin adı, əsərləri mədəniyyət tariximizdə daim yaşayacaqdır.
Xalq şairinin oğlu Azad Rüstəmzadə ümummilli lider Heydər Əliyevin onun atasına daim diqqət və qayğı ilə yanaşdığını söylədi, Dövlət mükafatının, Sosialist Əməyi Qəhrəmanı kimi fəxri ad və mükafatları ona ulu öndərin şəxsən təqdim etdiyini, şairin 90 illik yubileyində böyük nitq söyləyərək, haqqında yüksək fikirlər dediyini minnətdarlıq hissləri ilə xatırlatdı. O, atasının 100 illik yubileyinin keçirilməsinə dair imzaladığı Sərəncama görə Azərbaycan Prezidenti İlham Əliyevə ailə üzvləri adından minnətdarlığını bildirdi, yubiley gecəsinin təşkilatçılarına və iştirakçılarına təşəkkür etdi.
Rəsmi hissədən sonra incəsənət ustaları musiqili-ədəbi proqramla çıxış etdilər.
Baş nazirin müavini Elçin Əfəndiyev yubiley gecəsində iştirak edirdi.
Bölmənin digər xəbərləri
