Xəzər Universitetinin əməkdaşı Kaunas Texnologiya Universitetində keçirilən “Erasmus+” Məlumat Günündə iştirak etmişdir
Bakı, 30 oktyabr (AZƏRTAC). Xəzər Universitetinin keyfiyyətin təminatı mərkəzinin rəhbəri Lyudmila Sotova Litvanın Kaunas Texnologiya Universitetinin (KTU) təşkil etdiyi “Erasmus+” Məlumat Günündə iştirak etmişdir.
Xəzər Universitetindən AZƏRTAC-a bildirmişlər ki, “Şərq Tərəfdaşlığı” ölkələri üçün nəzərdə tutulan tədbir Avropa Komissiyası tərəfindən KTU-nun ev sahibliyi ilə 2014-cü ilin yanvarında başlanılacaq “Erasmus +” proqramının təqdimatı məqsədi ilə təşkil edilmişdir. Bu proqram “Şərq Tərəfdaşlığı” ölkələri universitetlərinin tələbə və əməkdaşlarının Avropada təhsil almaq və ya təlim keçmək imkanlarını daha da genişləndirəcəkdir.
Tədbirdə “Erasmus +” proqramının yeni elementləri və prinsipləri haqqında məlumat verilmiş, qabiliyyətlərin inkişaf etdirilməsi, kredit və dərəcə mobilliyi haqqında danışmışlar.
Məlumat Günündə universitetlər, təhsil nazirlikləri, Avropa İttifaqına üzv ölkələrin tələbə birlikləri və “Şərq Tərəfdaşlığı” ölkələrindən 130 nümayəndə iştirak etmişdir.
Bölmənin digər xəbərləri
