Xocalı soyqırımı Azərbaycan tarixinin ən dəhşətli səhifələrindən biridir
Naxçıvan, 26 fevral, AZƏRTAC
Naxçıvan Dövlət Universitetində Xocalı soyqırımının 33-cü ildönümünə həsr edilmiş tədbir keçirilib.
Universitetin Media və ictimaiyyətlə əlaqələr şöbəsindən AZƏRTAC-ın bölgə müxbirinə bildirilib ki, əvvəlcə ali təhsil ocağının İncəsənət fakültəsinin təşkil etdiyi rəsm sərgisinə baxış olub.
Tədbirdə Ümummilli Lider Heydər Əliyevin və şəhidlərimizin əziz xatirəsi bir dəqiqəlik sükutla yad edilib, Dövlət Himni səsləndirilib.
Naxçıvan Dövlət Universitetinin rektoru Elbrus İsayev Xocalı soyqırımının Azərbaycan tarixinin ən dəhşətli səhifələrindən biri olduğunu söyləyib, hadisənin başvermə səbəbi və nəticələri barədə ətraflı məlumat verib. Rektor qeyd edib ki, Xocalı soyqırımına ilk dəfə hüquqi-siyasi qiymətin verilməsi Ulu Öndər Heydər Əliyevin adı ilə bağlıdır. Onun təşəbbüsü ilə 1994-cü il fevralın 24-də Milli Məclis “Xocalı soyqırımı günü haqqında” qərar qəbul edib, beynəlxalq ictimaiyyəti erməni terrorizminə qarşı tədbirlər görməyə çağırıb. Eyni zamanda, bu gün də faciə ilə bağlı həqiqətlərin dünya ictimaiyyətinə çatdırılması, erməni qəsbkarlarının beynəlxalq müstəvidə ifşası mühüm vəzifə kimi qarşıya qoyulub.
Rektor Prezident İlham Əliyevin “Xocalı şəhərində Xocalı Soyqırımı Memorial Kompleksinin yaradılması haqqında” Sərəncamını qeyd edərək bildirib ki, bu gün suverenliyimiz tam bərpa olunub, keçmiş köçkünlər öz yurdlarına, o cümlədən Xocalıya qayıdırlar.
Naxçıvan Dövlət Universitetinin professoru, AMEA-nın müxbir üzvü Hacıfəxrəddin Səfərli qeyd edib ki, Xocalı faciəsi bəşər tarixində misli görülməmiş qətliam olub. Erməni qəsbkarları 106 qadın, 63 uşaq və 70 yaşlı insan olmaqla, 613 nəfəri qətlə yetiriblər. Professor 1275 insanın əsir və girov götürülərək işgəncələrə məruz qaldığını, 150 Xocalı sakininin taleyindən xəbər olmadığını vurğulayıb. Həmçinin dövlətimiz tərəfindən ölkə daxilində və xaricdə Xocalı soyqırımını dünya ictimaiyyətinə çatdırmaq istiqamətində həyata keçirilən ardıcıl tədbirlər, Heydər Əliyev Fondu tərəfindən “Xocalıya ədalət!” beynəlxalq təbliğat-təşviqat kampaniyası barədə məlumat verib.
Qeyd edilib ki, 2020-ci il 44 günlük Vətən müharibəsi dövründə Müzəffər Ali Baş Komandanın rəhbərliyi ilə misilsiz igidlik nümunələri göstərən qəhrəman ordumuz 30 il işğal altında qalan torpaqlarımızı azad etməklə yeni reallıqlar yaradıb, “Dəmir yumruq” qalib gəlib, Xocalı faciəsi qurbanlarının da qisası alınıb.
Vurğulanıb ki, Xocalı şəhəri 2023-cü il sentyabrın 19-20-də Azərbaycan Ordusunun Qarabağda keçirdiyi lokal xarakterli antiterror tədbirləri nəticəsində separatçılardan təmizlənib. Prezident İlham Əliyev 2023-cü il oktyabrın 15-də Xocalı şəhərində Azərbaycan Respublikasının Dövlət Bayrağını ucaldıb.
Sonra Xocalı faciəsinə həsr olunan videoçarx izlənilib.
Tədbir bədii hissə ilə davam etdirilib.
Bölmənin digər xəbərləri
