Xocalı soyqırımı insanlıq əleyhinə ən ağır cinayətlərdən biridir
Mingəçevir, 26 fevral, Vüsalə Cənnətova, AZƏRTAC
Mİngəçevir, Daşkəsən və Gədəbəydə Xocalı soyqırımının 33-cü ildönümü ilə bağlı anım tədbirləri keçirilib.
AZƏRTAC-ın bölgə müxbirinin verdiyi məlumata görə, Mingəçevir Şəhər İcra Hakimiyyətinin, YAP şəhər təşkilatının, hüquq-mühafizə orqanlarının, idarə, müəssisə və təşkilatların rəhbərləri, ictimaiyyət nümayəndələri, şəhid ailələri, qazilər və veteranlar Mingəçevir Şəhidlər Xiyabanında Soyqırımı abidə-kompleksini ziyarət edərək, önünə əklil və gül dəstələri düzüblər. Azərbaycanın ərazi bütövlüyü və suverenliyi uğrunda şəhid olmuş bütün Vətən övladlarının, Xocalı faciəsi qurbanlarının xatirəsi ehtiramla yad olunub.
Şəhər icra hakimiyyətində davam etdirilən tədbirdə bildirilib ki, 1992-ci il fevralın 25-dən 26-na keçən gecə davamlı artilleriya atəşindən sonra Ermənistan silahlı qüvvələri və yarım-hərbi birləşmələri keçmiş sovet ordusunun 366-cı motoatıcı alayının köməyi ilə şəhərə hücum edərək, mülki əhaliyə misli görünməmiş vəhşiliklə divan tutmuşlar. Həmin qətliam nəticəsində 613 azərbaycanlı, o cümlədən 106 qadın, 63 uşaq, 70 ahıl xüsusi amansızlıqla qətlə yetirilmiş, 1275 nəfər əsir götürülmüş, onlardan 150-nin taleyi isə indiyədək naməlum qalıb. 8 ailə tamamilə məhv edilib, 25 uşaq valideynlərindən hər ikisini, 130 uşaq isə valideynlərindən birini itirib. 487 şəxs, o cümlədən 76 uşaq məruz qaldıqları ağır fiziki və psixoloji işgəncələrdən ömürlük əlilə çevrilib.
Xocalı sakinləri 33 il əvvəl yaşadıqları faciəyə dair faktları diqqətə çatdırıblar. Bu gün hər bir azərbaycanlının Xocalı soyqırımının günahsız qurbanlarının əziz xatirəsini ehtiramla yad etməklə yanaşı, Müzəffər Ali Baş Komandan İlham Əliyevin rəhbərliyi ilə şanlı Azərbaycan Ordusunun düşmən üzərində qazandığı tarixi Zəfərin sevincini və qürurunu yaşadığı qeyd olunub.
Daşkəsəndə də rayon icra hakimiyyətinin və YAP rayon təşkilatının məsul əməkdaşları, rayonun hüquq-mühafizə orqanlarının rəhbərləri, ictimaiyyət nümayəndələrinin iştirakı ilə Xocalı soyqırımının 33-cü ildönümünə həsr olunan toplantı keçirilib.
Erməni işğalçı qüvvələrinin Xocalıda törətdiyi kütləvi qırğının sülh və insanlıq əleyhinə yönələn əməl olduğu və ən ağır cinayətlərdən biri sayıldığı qeyd edilib. Soyqırımı aktına ilk dəfə Ümummilli Lider Heydər Əliyevin təşəbbüsü ilə hüquqi-siyasi qiymət verildiyi vurğulanıb. Xatırladılıb ki, Xocalı soyqırımı ilə bağlı beynəlxalq səviyyədə məlumatlılığın artırılmasına, bu faciənin dünya ictimaiyyəti tərəfindən tanınması və qətliama siyasi-hüquqi qiymətin verilməsinə yönəlmiş “Xocalıya ədalət!” kampaniyası Heydər Əliyev Fondunun təşkilatçılığı ilə dünyanın bir çox ölkəsində davamlı olaraq həyata keçirilir.
Artıq Qarabağ və Şərqi Zəngəzurda “Böyük Qayıdış” Proqramına uyğun olaraq sürətlə icra edilən bərpa-quruculuq işlərindən də söz açılıb. Respublikamızın müxtəlif şəhər və rayonlarında müvəqqəti məskunlaşan Xocalıdan olan keçmiş məcburi köçkünlərin də öz tarixi ata-baba yurdlarına qayıtmaları qürur hissi ilə vurğulanıb.
Gədəbəydə də Xocalı soyqırımı qurbanlarının əziz xatirəsi ehtiramla anılıb. Rayon icra hakimiyyətinin, YAP rayon təşkilatının, hüquq-mühafizə orqanlarının, idarə, müəssisə və təşkilatların rəhbərləri, ictimaiyyət nümayəndələri, şəhid ailələri, qazilər və veteranlar məktəblilərin Xocalı faciəsi mövzusunda ərsəyə gətirdikləri əl işlərindən ibarət rəsm sərgisinə tamaşa ediblər. Sonra rayondakı Heydər Əliyev Mərkəzində XX əsrin qanlı faciəsi - Xocalı soyqırımına həsr edilmiş ədəbi-bədii kompozisiya nümayiş olunub. Xocalı soyqırımı qurbanlarının xatirəsinin daim qəlblərdə yaşayacağı bildirilib.
Bölmənin digər xəbərləri
