Xocalı soyqırımının 25-ci ildönümü Polşada silsilə tədbirlərlə qeyd edilib
Bakı, 2 mart, AZƏRTAC
Fevralın 8-dən başlayaraq Azərbaycan Respublikasının Polşa Respublikasındakı səfirliyi tərəfindən Xocalı soyqırımının iyirmi beşinci ildönümü ilə bağlı silsilə tədbirlər keçirilib.
Belə tədbirlərdən biri Radom Ali Ticarət Məktəbində təşkil edilib. Səfir Həsən Həsənov məktəbin müəllim və tələbə heyəti qarşısında çıxış edərək Ermənistan-Azərbaycan, Dağlıq Qarabağ münaqişəsi və Xocalı soyqırımı haqqında ətraflı məlumat verib. Tədbir iştirakçılarına münaqişəyə və soyqırımına dair kitablar və broşürlər təqdim edilib. Səfir Xocalı soyqırımının bəşəriyyət tarixində ən qanlı faciələrdən biri olduğunu qeyd edib, 1992-ci il fevralın 25-dən 26-na keçən gecə erməni təcavüzkarları tərəfindən qədim Xocalı şəhərinin yerlə-yeksan edildiyini, əhalinin isə soyqırımına məruz qaldığını diqqətə çatdırıb. Faciədən 25 il keçməsinə baxmayaraq, dünya ictimaiyyətinin bu hadisəyə biganə qaldığını qeyd edən səfir hər kəsi “Xocalıya ədalət!” kampaniyasına qoşulmağa dəvət edib.
Səfir Həsən Həsənov Tereşin qminasına səfəri çərçivəsində bu yaşayış məntəqəsinin sakinləri qarşısında da çıxış edib. O, ölkəmiz, xüsusilə Ermənistan-Azərbaycan, Dağlıq Qarabağ münaqişəsi, habelə Xocalı soyqırımı haqqında şəhər sakinlərinə ətraflı məlumat verib, onları maraqlandıran sualları cavablandırıb.
Bundan başqa, səfirliyin dəstəyi ilə Varşavada Polşada Azərbaycanlı Gənclər Şurası tərəfindən Xocalı soyqırımının 25-ci ildönümü ilə bağlı aksiya keçirilib. Varşava şəhərinin mərkəzində keçirilmiş aksiya çərçivəsində Xocalıda qətlə yetirilmiş azərbaycanlıların xatirəsinə ehtiram əlaməti olaraq şamlar yandırılıb, səfirlik tərəfindən hazırlanmış bukletlər və açıqcalar şəhər sakinlərinə paylanılıb.
Səfirlikdə Polşa ictimaiyyətinin və Azərbaycan diasporunun nümayəndələrinin iştirakı ilə Xocalı soyqırımının iyirmi beşinci ildönümü ilə bağlı anım tədbir keçirilib. Tədbirdə çıxış edən səfir H.Həsənov Ermənistan-Azərbaycan, Dağlıq Qarabağ münaqişəsinin tarixi, həmçinin erməni millətçiləri tərəfindən xalqımıza qarşı müxtəlif vaxtlarda məqsədyönlü şəkildə həyata keçirilən terror, etnik təmizləmə, Xocalı soyqırımı barədə məlumat verib, iştirakçıların suallarını cavablandırıb.
Varşavada fəaliyyət göstərən Beynəlxalq Vətəndaş Cəmiyyəti İnstitutunda keçirilmiş tədbirdə səfir Həsən Həsənov geniş məruzə ilə çıxış edib. O, tədbir iştirakçılarını Ermənistan-Azərbaycan, Dağlıq Qarabağ münaqişəsinin tarixi və Xocalı soyqırımı barədə məlumatlandırıb.
Daha bir anım tədbiri isə Varşava Universitetində təşkil edilib. Tədbirdə çıxış edən Azərbaycan Mədəniyyət Mərkəzinin sədri Şəhla Kazımova tələbələrə Xocalı soyqırımı barədə ətraflı məlumat verib. Tədbir iştirakçılarına səfirlik tərəfindən polyak dilində nəşr edilmiş kitablar və broşürlər təqdim edilib.
Səfirliyin dəstəyi ilə Polşanın Vrotslav Universitetinin tələbələri tərəfindən təşkil olunmuş tədbirdə universitetin rektoru, müəllim heyəti və müxtəlif ölkələrdən olan tələbələr iştirak ediblər. Tədbirin təşkilində Vrotslav Universitetində təhsil alan Kamilə Hacıyeva və Murad Məmmədli xüsusi fəallıq göstəriblər. K.Hacıyeva Xocalı soyqırımı ilə bağlı geniş məlumatların əks olunduğu təqdimatla çıxış edib. Səfir Həsən Həsənov faktlara əsaslanaraq Ermənistan-Azərbaycan, Dağlıq Qarabağ münaqişəsinin tarixi kökləri barədə iştirakçılara ətraflı məlumat verib. Bundan əlavə, mövzu ilə əlaqədar səfirlik tərəfindən polyak dilində nəşr edilmiş kitab və broşürlər iştirakçılara təqdim olunub.
Vrotslav şəhərində təhsil alan azərbaycanlı tələbələr Murad Məmmədli, Kamilə Hacıyeva, Xəyal İbrahimov, Anar Hüseynov, Hikmət Məmmədzadə və başqalarının təşkilatçılığı və səfirliyin dəstəyi ilə şəhərin mərkəzində aksiya keçirilib. Aksiyada iştirakçılar Vrotslav sakinlərinə Xocalı soyqırımı barədə açıqca və bukletlər paylayıb, faciənin mahiyyəti barədə danışıblar.
Fevralın 20-dən etibarən Azərbaycanın Varşavadakı səfirliyinin binası üzərində Xocalı soyqırımı ilə bağlı şüarlar asılıb, həmçinin səfirliyin qarşısında “Xocalı soyqırımı beynəlxalq cinayət kimi” stendi yerləşdirilib.
Səfirliyin təşəbbüsü ilə Polşanın kresy.pl internet səhifəsində “Xocalı soyqırımı beynəlxalq cinayət kimi” adlı məqalə dərc edilib (http://www.kresy.pl/wydarzenia,polityka?zobacz/ludobojstwo-w-chodzaly-jako przestepstwo-miedzynarodowe). Məqalədə Xocalı soyqırımının başvermə səbəbləri və nəticələri barədə məlumat verilir, daha sonra Xocalı soyqırımının beynəlxalq cinayət olması barədə hüquqi təhlil aparılır.
Həmçinin Decydent & Decision Maker portalında “Xocalıda soyqırımı” başlıqlı məqalə yayılıb (http://decydent.pl/z-kroniki-bywalca-24/). Məqalədə səfirlik tərəfindən Xocalı soyqırımının iyirmi beşinci ildönümü ilə bağlı tədbirlər keçirilməsi, habelə Xocalı soyqırımının nəticələri haqqında məlumat verilir.
Bölmənin digər xəbərləri
