YAP Gədəbəy rayon təşkilatının XI hesabat konfransı keçirilib
Bakı, 9 avqust, AZƏRTAC
Avqustun 9-da Yeni Azərbaycan Partiyası (YAP) Gədəbəy rayon təşkilatının videoformatda XI hesabat konfransı keçirilib.
YAP-ın mətbuat xidmətindən AZƏRTAC-a bildiriblər ki, əvvəlcə müasir müstəqil Azərbaycan dövlətinin memarı, Yeni Azərbaycan Partiyasının yaradıcısı, ümummilli lider Heydər Əliyevin və torpaqlarımızın azadlığı uğrunda canlarından keçən şəhidlərimizin əziz xatirəsi bir dəqiqəlik sükutla yad edilib.
Konfransın gündəliyi təsdiq olunduqdan sonra YAP Gədəbəy rayon təşkilatının sədri Rüstəm Nağıyev hesabat məruzəsi ilə çıxış edib. Bildirib ki, hazırda rayon təşkilatı 80 ərazi ilk partiya təşkilatında 5816 partiya üzvünü birləşdirir. Partiya üzvlərinin 2098 nəfəri qadınlar, 2273 nəfəri isə gənclərdir. R.Nağıyev qeyd edib ki, partiyanın hər bir üzvü ümummilli lider Heydər Əliyevin ideyalarına sadiqliyini nümayiş etdirərək onun layiqli davamçısı, Prezident İlham Əliyevin rəhbərliyi ilə ölkəmizin qüdrətlənməsi və inkişafı, rayonumuzun rifahı naminə əlindən gələni əsirgəmir, bundan sonra da bu yolla inamla addımlayacaq.
Vətən müharibəsində əldə olunan parlaq Qələbəmizin yaratdığı reallıqlardan bəhs edən R.Nağıyev deyib ki, yeni çağırışların həyata keçirilməsində Yeni Azərbaycan Partiyası daim ön sıralarda olub. YAP Gədəbəy rayon təşkilatının çoxsaylı üzvləri də daim ölkə Prezidenti, Müzəffər Ali Baş Komandan İlham Əliyevin ətrafında sıx birləşərək, hədəflərin gerçəkləşməsinə öz töhfələrini verməyə çalışırlar.
Sonra YAP Gədəbəy rayon təşkilatının Nəzarət-Təftiş Qrupunun sədri Yusif Murğuzovun hesabatı dinlənilib.
Müzakirələr zamanı Gədəbəy Rayon İcra Hakimiyyətinin başçısı İbrahim Mustafayev, Yeni Azərbaycan Partiyasının Təftiş Komissiyasının sədri, Milli Məclisin deputatı Sevinc Hüseynova, Gədəbəy rayon Ağsaqqallar Şurasının sədri Kərəm Məmmədov, YAP Gədəbəy rayon təşkilatı Qadınlar Şurasının sədri Məlahət Əliyeva, rayon təşkilatının Şura üzvü Namiq Rüstəmov hesabat dövründə görülən işlərdən bəhs ediblər.
Konfransda çıxış edən YAP Mərkəzi Aparatının Təşkilat şöbəsinin müdiri Əhliman Tağıyev bildirib ki, ümummilli lider Heydər Əliyevin əsasını qoyduğu ənənələr Yeni Azərbaycan Partiyası tərəfindən uğurla həyata keçirilir. İdeyalarla zəngin olan YAP dövlətçiliyimizin inkişafı, xalqın rifahı, xoşbəxt gələcəyi naminə fəaliyyət göstərən və konkret konsepsiyaya malik siyasi təşkilatdır. Bu gün qürur hissi ilə qeyd edirik ki, ulu öndər Heydər Əliyevin şah əsəri olan müasir müstəqil Azərbaycan dövləti son 18 ildə Prezident İlham Əliyevin rəhbərliyi ilə möhkəm təməl üzərində yeni, daha təkmil islahatlar əsasında inkişaf edir. Bu, Yeni Azərbaycan Partiyasının cəmiyyətdə möhkəmlənən mövqeyində, sıralarını kəmiyyət və keyfiyyət baxımından zənginləşdirməsində, yeni-yeni hədəflərə doğru inamla irəliləməsində də aydın ifadəsini tapır.
Hər bir rayon təşkilatının YAP-ın qarşıya qoyduğu hədəflərə, çağırışlara yüksək səviyyədə nail olmasında öz payı olduğunu vurğulayan Ə.Tağıyev YAP Gədəbəy rayon təşkilatının gələcək fəaliyyətinə uğurlar arzulayıb.
Konfransda YAP Gədəbəy rayon təşkilatının hesabat dövrü ərzindəki fəaliyyəti qənaətbəxş qiymətləndirilib.
Bölmənin digər xəbərləri
