YAP SUMQAYIT ŞƏHƏR TƏŞKİLATININ V KONFRANSI OLMUŞDUR
Konfrans iştirakçıları partiyanın banisi və təşkilatçısı, ümummilli lider Heydər Əliyevin xatirəsini bir dəqiqəlik sükutla yad etmişlər.
Məruzə ilə çıxış edən YAP şəhər təşkilatının sədri, Milli Məclisin deputatı Xıdır Alovlu bildirmişdir ki, 1993-cü ilin fevralında yaradılmış Sumqayıt təşkilatı partiyanın ilk bölgə təşkilatlarından biridir. Hazırda onun 57 ilk təşkilatının15 minə yaxın üzvü var. Şəhər təşkilatında Qadınlar Şurası və Gənclər Birliyi uğurla fəaliyyət göstərirlər.
Məruzəçi son vaxtlar Sumqayıtda baş vermiş müsbət dəyişikliklərdən ətraflı danışaraq bildirmişdir ki, bütün bunlar şəhərdə sağlam ictimai-mənəvi ab-havanın yaranmasına kömək edir.
Məruzə ətrafında çıxış edənlər şəhər partiya təşkilatının fəaliyyətini müsbət qiymətləndirmişlər.
Şəhər icra hakimiyyətinin başçısı, YAP idarə heyətinin üzvü Vaqif Əliyev çıxışında partiyanın tarixi rolundan söhbət açaraq bildirmişdir ki, çox mürəkkəb bir dövrdə məhz müdrik siyasətçi və təşkilatçı Heydər Əliyev əsl vətənpərvərləri öz ətrafında sıx birləşdirərək, xalqın iradəsi ilə bu partiyanı yaratmış və partiya Azərbaycanın dirçəlişi kimi məsul bir vəzifəni öz üzərinə götürmüşdür.
Şəhər rəhbərinin və digər natiqlərin çıxışlarında ədalətli iradlar da əksini tapmış, Sumqayıtın həyatında şəhər təşkilatının iştirakını genişləndirməyin vacibliyi vurğulanmışdır.
Konfrans iştirakçıları qətnamə və Azərbaycan Prezidenti İlham Əliyevə müraciət qəbul etmişlər.
