Yaponiya Şimali Koreyanın nüvə silahının ləğvi üçün əməkdaşlığı davam etdirəcək
Tokio, 26 avqust, AZƏRTAC
Yaponiya Koreya yarımadasında nüvə silahının ləğvi üçün beynəlxalq ictimaiyyətlə, o cümlədən Rusiya və Çin ilə fəal əməkdaşlığı davam etdirəcək.
AZƏRTAC xəbər verir ki, bu barədə Yaponiya Nazirlər Kabinetinin baş katibi Yoşihide Suqa avqustun 26-da keçirilən ənənəvi mətbuat konfransında deyib.
“Biz Koreya yarımadasında nüvə silahının ləğvi üçün Yaponiya-ABŞ əməkdaşlığını, həmçinin Yaponiya-ABŞ-Cənubi Koreya üçtərəfli iş birliyini, o cümlədən beynəlxalq ictimaiyyətlə, ilk növbədə, Rusiya və Çin ilə əməkdaşlığı davam etdirəcəyik”, - deyə Y.Suqa vurğulayıb. Baş katib, həmçinin qeyd edib ki, G7 sammitinin keçirildiyi Biarritsdə bazar günü Yaponiyanın Baş Naziri Şinzo Abe və ABŞ Prezidenti Donald Tramp Şimali Koreyanın raket-nüvə proqramı və bu ölkənin kəşfiyyat orqanları tərəfindən oğurlanmış yaponlarla əlaqədar sıx əməkdaşlığı davam etdirmək barədə razılığa gəliblər.
Xatırladaq ki, Biarritsdə G7 sammiti Pxenyanın növbəti raket sınağı fonunda işə başlayıb. Bu, son ay yarımda Şimali Koreyanın yaxın məsafəli yeddinci ballistik raket sınağıdır.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
