Yaponiyada Hirosima qurbanlarının xatirəsi anılmışdır
Hirosima, 6 avqust (AZƏRTAC). Avqustun 6-da Yaponiyada Hirosima qurbanlarının xatirəsi anılmışdır. Hirosima şəhərinin mərkəzindəki Sülh parkında faciənin 67-cı ildönümünə həsr olunmuş anma mərasimi keçirilmişdir.
Mərasimdə şəhər ictimaiyyətinin nümayəndələri ilə yanaşı, bu ölkədə akkreditə olunmuş diplomatik korpusun təmsilçiləri, o cümlədən Azərbaycanın Yaponiyadakı səfiri və çoxsaylı əcnəbi qonaqlar iştirak etmişlər.
1945-ci il avqustun 6-da İkinci Dünya müharibəsini tezliklə qurtarmağa çalışan ABŞ Hirosima şəhərinə atom bombası atmışdır.
Bombardmandan bir saat əvvəl üç kəşfiyyatçı təyyarə hava haqqında məlumat toplamaq üçün qeyd edilmiş rayonun üzərindən uçmuşdur. Daşıyıcı təyyarə B-29 “Enola Qey”dən 6-7 kilometr aralı uçan və müvafiq aparatura ilə təmin edilmiş təyyarə nüvə partlayışının parametrini müəyyən etmiş, 70 kilometr aralı gələn təyyarə isə partlayışla bağlı çəkilişlər aparmışdır.
Yaponiyanın Hava Hücumundan Müdafiə qüvvələri bombardmançı təyyarələri qeydə alsa da, onların sayı az olduğuna görə lazımi reaksiya verməmiş, elan edilmiş hava hücumu həyəcanı tezliklə ləğv edilmişdi. Yapon qırıcıları və zenit batareyası da düşmənə lazımi diqqət yetirməmişdi.
Səhər saat 8.15-də Hirosimaya 10 min metr yüksəklikdən atılan “Balaca” adlı atom bombası 600 metr hündürlükdə partlamışdır. Nəticədə 200 minədək insan həlak olmuş və ya itkin düşmüş, 160 min insan yaralanmış və ya radioaktiv şüalanmaya məruz qalmışdır. Həlak olanların böyük əksəriyyəti mülki vətəndaşlar idi.
Partlayışın episentrindən dörd kilometr məsafədə başlamış yanğınlar saatlarla davam etmişdir. Şəhərdəki 90 min binadan 62 mini tamamilə məhv olmuşdur.
Avqustun 9-da saat 11.02-də digər yapon şəhəri Naqasakiyə ikinci atom bombası atılmışdır.
Hadisədən on il sonra avqustun 6-da Hirosimada atom və hidrogen silahlarının ləğvinə həsr edilmiş ilk konfrans keçirilmiş, 1985-ci ildə isə Sakit okeanın cənub hissəsi nüvəsiz zona elan edilmişdir.
Anma mərasimi meydandakı Xatirə abidəsinin önünə çələnglərin qoyulması ilə başlanmışdır.
Tədbirdə çıxış edən Baş nazir Yoşihiko Noda bildirmişdir ki, Yaponiya dünyada iki atom bombasına tuş gəlmiş yeganə ölkədir. Lakin buna baxmayaraq, Yaponiya ölkə Konstitusiyasına uyğun olaraq müharibəni beynəlxalq məsələlərin həllində vasitə hesab etmir və bundan imtina etmişdir. Yaponiyanın bundan sonra da həmişə Konstitusiyanın bu maddəsinə əməl edəcəyini vurğulayan Baş nazir dünya dövlətlərini nüvə silahından imtinaya çağırmışdır. 2011-ci il martın 11-də “Fukusima-1” Atom Elektrik Stansiyasında (AES) baş vermiş faciəni xatırladan Y.Noda bütün dünyanı alternativ enerji mənbələrindən istifadəyə səsləmişdir.
Baş nazir demişdir ki, Yaponiya AES-lərdə istehsal edilən enerjidən asılı olmayan cəmiyyət yaratmağa çalışacaqdır. Dünyada atom bombardmanının yeganə qurbanı olmuş ölkə kimi Yaponiya, Hirosimada baş verənlərin gələcək nəsillərə çatdırılması missiyasını da öz üzərinə götürmüşdür.
Y.Noda qeyd etmişdir ki, Yaponiya nüvə silahının ləğvi ilə bağlı təbliğat işində fəal olacaq və onun yayılmasının qarşısının alınmasında səylərini əsirgəməyəcəkdir.
Həmin gün Hirosimadakı Atom evinin ətrafında ölkə QHT-ləri tərəfindən çoxsaylı tədbirlər də təşkil edilmişdir. “Qoi” fondu tərəfindən təşkil edilmiş “Bayraq mərasimi”ndə Azərbaycanın dövlət bayrağı da dalğalandırılmış, xalqımızın bütün dünyaya sülh arzusu çatdırılmışdır.
Vüqar Ağayev
AZƏRTAC-ın xüsusi müxbiri
Hirosima
Bölmənin digər xəbərləri
