Yaponiyanın Baş naziri NATO-nun Zirvə görüşündə iştirak edəcək
Pekin, 25 may, AZƏRTAC
Yaponiyanın Baş naziri Fumio Kişida iyulda NATO-nun Litvada keçiriləcək Zirvə görüşündə iştirak edəcək.
AZƏRTAC Yaponiya mediasına istinadla xəbər verir ki, Baş nazirin sammitdə iştirakı ilə əlaqədar hazırlıq işləri görülür. Yaponiya NATO-nun Zirvə toplantısında tərəfdaş ölkə statusu ilə təmsil ediləcək. Bu, Baş nazir Fumio Kişidanın NATO Zirvə toplantısında ikinci iştirakı olacaq. O, ötən il Şimali Atlantika alyansının Sammitində ilk dəfə iştirak edən Yaponiya Baş naziri olub.
Ukraynaya dəstək məsələsi NATO-nun Litva Sammitinin gündəmində əsas yer tutacaq.
Qeyd edək ki, Rusiya-Ukrayna müharibəsi başlayandan bəri nəinki Avropada, hətta Asiyada da NATO-ya üzv olmaq və ya tərəfdaşlığı dərinləşdirmək istəyən ölkələrin sayı artıb. Yaponiyanın NHK televiziya kanalı yazır ki, Baş nazir Fumio Kişida Rusiya-Çin əməkdaşlığının genişlənməsi, habelə Şimali Koreyanın nüvə-raket fəaliyyəti fonunda NATO ilə tərəfdaşlığı dərinləşdirmək istəyir.
Medianın məlumatına əsasən, Cənubi Koreya Prezidenti Yun Sok Yol da NATO-nun Litva Sammitində iştirak edəcək.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
