YARDIMLIDA POLİS GÜNÜ TƏNTƏNƏ İLƏ QEYD EDİLMİŞDİR
AZƏRTAC-ın müxbiri xəbər verir ki, iyulun 2-də Yardımlı şəhərindəki «Sahil» stadionuna toplaşan 2 min nəfərdən çox rayon sakini polis gününü təntənə ilə qeyd etmişdir.
Polis işçiləri və rayon ictimaiyyətinin nümayəndələri əvvəlcə Heydər Əliyev parkında ümummilli liderimizin büstünün önünə gül dəstələri düzərək böyük öndərin xatirəsini ehtiramla yad etmiş, şəhid polis işçisi Məharət Mirzəyevin qəbrini ziyarət etdikdən sonra onun ailəsinə baş çəkmişlər.
Mərasim polis işçilərinin və polis maşınlarının paradı ilə başlanmışdır. Asayiş keşikçiləri əlbəyaxa döyüş idman növü üzrə bacarıqlarını və fiziki hazırlıqlarını nümayiş etdirmişlər.
Bayram tədbiri şəhər mədəniyyət sarayında davam etmişdir. Burada keçirilən toplantıda rayon icra hakimiyyəti başçısının birinci müavini Etibar Fərruxov, polis şöbəsinin rəisi Mircamal Seyidli və rayon ictimaiyyətinin nümayəndələri çıxış edərək, polis işçilərini peşə bayramları münasibətilə təbrik etmiş, ictimai asayişin qorunmasında və cinayətkarlığa qarşı mübarizədə onların əməyini yüksək qiymətləndirmişlər.
Yığıncaqda polis gününə həsr olunmuş mini-futbol üzrə rayon birinciliyinin qaliblərinə mükafatlar təqdim edilmişdir.
Toplantıda Prezident İlham Əliyevə müraciət qəbul edilmişdir.
