Bakı, 24 sentyabr, AZƏRTAC

Sentyabrın 24-də Yaşıl İqlim Fondu ilə əməkdaşlığa hazırlıqla bağlı “Kənd təsərrüfatı və torpaqdan istifadə, torpaqdan istifadənin dəyişməsi və meşə təsərrüfatı sektorlarında milli səviyyədə müəyyən edilmiş töhfələrin yerinə yetirilməsi ilə əlaqədar ölkə potensialının artırılması” layihəsi çərçivəsində ilk seminar keçirilib. BMT-nin Ərzaq və Kənd Təsərrüfatı Təşkilatının Azərbaycandakı Tərəfdaşlıq və Əlaqələndirmə Ofisi tərəfindən icra olunacaq və 18 ay davam edəcək layihə Yaşıl İqlim Fonduna birbaşa çıxışı olacaq qurumların müəyyən edilməsini və həmin istiqamətdə müvafiq təşkilatların potensialının artırılmasını hədəfləyir.

AZƏRTAC xəbər verir ki, tədbirdə çıxış edən Ekologiya və Təbii Sərvətlər nazirinin müavini Rauf Hacıyev Azərbaycan hökuməti üçün ekologiya və ətraf mühitin mühafizəsi məsələlərinin daim prioritet təşkil etdiyini bildirib. Nazir müavini qeyd edib ki, ölkəmiz müstəqilliyi bərpa etdikdən sonra ekologiyaya aid 20-dən çox beynəlxalq konvensiyaya qoşulub.

“Hazırda qlobal ekoloji problemlərdən biri də iqlim dəyişmələridir. Azərbaycan qlobal iqlim dəyişikliyinin təsirlərinə məruz qalan ölkələr sırasında yer alır. Bu təsirlər əsasən özünü quraqlıqlar, daşqınlar və temperatur artımı şəklində göstərir. Bu baxımdan ölkəmiz iqlim dəyişikliyi üzrə qlobal danışıqlar və təşəbbüslərdə fəal şəkildə iştirak edir.

Ölkəmiz Birləşmiş Millətlər Təşkilatının İqlim Dəyişmələri üzrə Çərçivə Konvensiyasına 1995-ci ildə qoşulub və 2016-cı ildə həmin Konvensiyaya əlavə olan Paris Sazişini imzalayıb və ratifikasiya edib. Paris Sazişinə əsasən inkişaf etməkdə olan ölkələr də qlobal iqlim dəyişikliyinin təsirlərinin azaldılmasında aktiv iştirak edərək atmosferə atılmaların azaldılması üzrə “Milli Səviyyədə Müəyyən Edilən Töhfələr” sənədini Konvensiya Katibliyinə təqdim etməyə dəvət ediliblər. Azərbaycan da “Milli Səviyyədə Müəyyən Edilən Töhfələr” barədə sənədi təqdim edərək qarşıya istixana effekti yaradan qaz emissiyalarını 1990-cı illə müqayisədə 35 faiz azaltmaq məqsədini qoyub.

Hazırda prioritet olaraq müəyyən edilmiş energetika, sənaye, kənd təsərrüfatı, torpaqlardan istifadə, meşəçilik və tullantıların idarə olunması sektorları üzrə bəzi öhdəliklərin yerinə yetirilməsinə başlanılıb”, - deyə R.Hacıyev bildirib.

Nazir müavininin sözlərinə görə, Yaşıl İqlim Fondunun dəstəyi ilə icrasına başlanılan əməkdaşlığa hazırlıq üzrə cari layihənin məqsədi ölkədə qeyd olunan tədbirlərin həyata keçirilməsini təmin edərək kənd təsərrüfatı, torpaqlardan istifadə və meşəçilik sektorları üzrə öhdəliklərin yerinə yetirilməsinə şərait yaratmaqdır: “Bugünkü seminar Azərbaycanın Yaşıl İqlim Fondu ilə əməkdaşlığa hazırlığa yönəlmiş növbəti tədbirlərdən biridir. Bu səbəbdən gələcək illərdə fondla əməkdaşlıq edəcək potensial təşkilatların nümayəndələri kimi, sizlərə seminardan maksimal şəkildə yararlanmağı tövsiyə edirəm. Qeyd etmək istərdim ki, Ekologiya və Təbii Sərvətlər Nazirliyi Birləşmiş Millətlər Təşkilatının Ərzaq və Kənd Təsərrüfatı Təşkilatı ilə bir neçə ildir ki, məqsədyönlü şəkildə əməkdaşlıq edir. Hesab edirəm ki, bu əməkdaşlıq gələcəkdə də uğurla davam etdiriləcək”.

BMT-nin Ərzaq və Kənd Təsərrüfatı Təşkilatının Azərbaycan üzrə Tərəfdaşlıq və Əlaqələndirmə Ofisinin rəhbəri Mələk Çakmak bildirib ki, Azərbaycanın ərazisinin fiziki və coğrafi xarakteristikası onu iqlim dəyişmələrinin mənfi təsirlərinə məruz qoyur: “Ən son qiymətləndirmələrə əsasən Azərbaycanda kənd təsərrüfatı, su və meşəçilik iqlim dəyişikliyinə ən həssas sektorlardandır. Ölkədə iqlim dəyişikliyinin mənfi təsirləri artıq hiss olunmaqdadır və bu, özünü daşqınlar, quraqlıqlar, bürkü və eləcə də yazın əvvəlindən başlayaraq havanın temperaturunun kəskin artması şəklində büruzə verir. Bu baxımdan ən həssas sektorlarda iqlim texnologiyası üzrə həllərin hərtərəfli qiymətləndirilməsi, adaptasiya üzrə milli strategiya və fəaliyyət planlarının hazırlanması və onların milli sektorlara inteqrasiyası Azərbaycan hökumətinin qarşısında duran əsas prioritetlər arasındadır”.

M.Çakmak qeyd edib ki, təyin edilmiş milli qurum kimi Ekologiya və Təbii Sərvətlər Nazirliyi və icraçı qurum kimi BMT-nin Ərzaq və Kənd Təsərrüfatı Təşkilatı Yaşıl İqlim Fondu tərəfindən təsdiq olunmuş ikinci əməkdaşlığa hazırlıq layihəsinə start verir. O, layihə çərçivəsində iqlim dəyişikliyinin qarşısının alınması istiqamətində atılacaq addımların töhfə verəcəyinə inandığını diqqətə çatdırıb.

“İnkişafda olan ölkə kimi Azərbaycan iqlim dəyişikliyini ciddi ətraf-mühit problemlərindən biri hesab edir və bu sahədə beynəlxalq əməkdaşlığı dəstəkləyir. BMT-nin Ərzaq və Kənd Təsərrüfatı Təşkilatı öz növbəsində dünyanın qabaqcıl təcrübələrin gətirilməsi və tətbiq edilməsi istiqamətində Azərbaycandan dəstəyini əsirgəməyəcək. İkinci əməkdaşlığa hazırlıq layihəsi akkreditasiya prosesinin başlanması üçün ən uyğun milli qurumun müəyyən edilməsini də hədəfləyir. Akkreditasiya prosesi müvafiq sektorlardan olan bütün qurumlara açıq olacaq”, - deyə M.Çakmak vurğulayıb.

Daha sonra BMT-nin Ərzaq və Kənd Təsərrüfatı Təşkilatının baş texniki məsləhətçisinin əvəzləyicisi və layihə koordinatoru Karmen Arquello Azərbaycanda ətraf mühit üzrə mövcud vəziyyət və iqlim sahəsində fəaliyyətlər, kənd təsərrüfatı da daxil olmaqla əsas sektorlarda iqlimlə bağlı tədbirlərin həyata keçirilmə imkanları barədə təqdimatla çıxış edib.

Tədbir sessiya və müzakirələrlə davam etdirilib.