YAXIN GÜNLƏRDƏ BAKIDA ELEKTRON TƏRƏZİNİN KÜTLƏVİ İSTEHSALINA BAŞLANACAQDIR
Azərbaycan Dövlət Xüsusi Maşınqayırma və Konversiya Komitəsinin sifarişi ilə Bakı Radioquraşdırma İstehsalat Birliyində yaxın günlərdə müxtəlif modifikasiyalı elektron tərəzilərin kütləvi buraxılışına başlanılacaqdır.
Komitədən AZƏRTAC-a bildirmişlər ki, “ATT-01” markalı elektron tərəzi sınaqdan uğurla çıxmışdır. Bu tərəzi Standartlaşma, Metrologiya və Patent üzrə Dövlət Agentliyinin qoyduğu texniki şərtləri tam ödəməklə yanaşı, respublikamıza kənardan gətirilən belə avadanlıqdan bir sıra parametrlərinə görə üstündür. Əvvəla, qiyməti ucuzdur. İkincisi, çəkisi (maksimum hədd 15 kiloqram) azdır. Ən əsası isə bu tərəzi müştərini aldatmaq niyyətinə düşən satıcının pərsəng düzəltmək cəhdini tamamilə mümkünsüz edən yüksək qorunma dərəcəsinə malikdir.
Birlikdə tezliklə cib mizanlarından başlayaraq, böyük həcmli (yükli avtomobillərin çəkilməsi üçün) müxtəlif modelli elektron tərəzilərin layihələndirilməsi və kütləvi istehsalı da nəzərdə tutulmuşdur.
Elektron tərəzilərə texniki xidmət göstərilməsi üçün respublikanın bütün bölgələrində servis mərkəzləri yaradılacaqdır. Bölgələrdən göndərilən mütəxəssislər Radioquraşdırma İstehsalat Birliyində müvafiq kurs keçdikdən sonra həmin mərkəzlərdə işlər təmin ediləcəklər.
Bölmənin digər xəbərləri
