Yaxın günlərdə Zaqatala şəhər stadionuna FİFA-nın lisenziyası təqdim olunacaqdır
Bakı, 14 noyabr (AZƏRTAC). Xəbər verildiyi kimi, Zaqatala şəhər stadionunda yenidənqurma işləri gedirdi. Stadionun süni ot örtüyünün dəyişdirilməsi ilə yanaşı, texniki zona və paltardəyişmə otaqları da təmir edilmişdir.
AZƏRTAC xəbər verir ki, yeni mövsümdə təmir işləri ilə əlaqədar “Simurq” futbol klubu ev oyunlarını doğma arenada keçirə bilmirdi.
Artıq FİFA-nın Stadionların Sertifikatlaşdırılması üzrə Komissiyasının beynəlxalq oyunları keçirməyə imkan verən sertifikatını vermək üçün Türkiyə, Orta Şərq və türk dövlətləri üzrə nümayəndəsi Cəmil Şahin Zaqatalaya səfər etmişdir. Mütəxəssis meydana baxış keçirmiş və lazımı analizləri götürərək, ali futbol qurumunun laboratoriyasına aparmışdır.
“Simurq” peşəkar idman klubunun vitse-prezidenti Fərhad Əfəndiyev qeyd etmişdir ki, stadionda aparılmış yenidənqurma işləri beynəlxalq standartlara cavab verir. Komissiya götürülən nümunələri analiz edəcək və qısa bir zamanda arenaya 2 ulduzun verildiyini təsdiqləyən sertifikatı “Simurq”a təqdim edəcəkdir.
Qeyd edək ki, bu cür sertifikatlar 1 il müddətinə qüvvədə olur. Vaxt bitdiyində yenidən stadiona baxış keçirilir və lisenziya verilir.
Bölmənin digər xəbərləri
