Yaxın Şərq və Körfəzdə neft hasilatı münaqişənin başlanğıcından bəri 45 faiz azalıb
Bakı, 13 may, AZƏRTAC
Apreldə Neft İxrac Edən Ölkələr Təşkilatına (OPEC) üzv və bəzi qeyri-OPEC neft istehsalçısı ölkələrdən ibarət OPEC+ qrupunun gündəlik hasilatı 1,9 milyon barel azalaraq 40,1 milyon barelə düşüb. Qrupun gündəlik neft istehsalı Yaxın Şərqdəki münaqişədən əvvəlki səviyyələrdən 11,9 milyon barel aşağıda qalıb, OPEC üzrə hasilat isə son 35 ilin ən aşağı səviyyəsinə düşüb.
AZƏRTAC xəbər verir ki, bu barədə Beynəlxalq Enerji Agentliyinin (IEA) aylıq hesabatında deyilir.
Məlumata görə, OPEC+ üzrə neft tədarükü martda ən aşağı səviyyəyə endikdən sonra aprel ayında məhdud bərpa göstərərək 90 min barel artaraq gündəlik 54,9 milyon barel olub. Buna baxmayaraq, İranın Qətərdəki enerji infrastrukturuna hücumlarından sonra yaranan itkilər səbəbindən hasilat münaqişədən əvvəlki səviyyələrdən gündə 820 min barel aşağı olaraq qalıb. Apreldə Körfəz ölkələrindən ümumi neft ixracı əvvəlki aya nisbətən 1,9 milyon barel artaraq gündəlik 10,5 milyon barelə yüksəlib. Səudiyyə Ərəbistanı, Birləşmiş Ərəb Əmirlikləri (BƏƏ), İraq və İrandan Hörmüz boğazından istifadə etmədən həyata keçirdiyi neft ixracı apreldə 1,3 milyon barel artaraq gündəlik 7,8 milyon barelə çatıb. Qətər də daxil olmaqla, Yaxın Şərq və Körfəz bölgəsində ümumi neft hasilatı müharibənin başlanğıcından bəri 14,4 milyon barel və ya 45 faiz azalaraq aprel ayında gündəlik 17,6 milyon barelə düşüb.
Hesabatda Hörmüz boğazının faktiki olaraq bağlı qaldığı və ABŞ ilə İran arasında danışıqların davam etdiyi, bunun da proqnozlarda əhəmiyyətli qeyri-müəyyənliklər yaratdığı bildirilib. Boğazın iyunun əvvəlinə qədər bağlı qalacağı və minatəmizləmə əməliyyatlarından sonra ixracın tam normal vəziyyətə qayıtması üçün ən azı iki-üç ay lazım olacağı, Yaxın Şərq neft hasilatının əhəmiyyətli dərəcədə bərpasının isə daha uzun çəkəcəyi ehtimal edilir. Həmçinin qeyd olunub ki, enerji infrastrukturuna dəyən ziyan cari hesablamalara daxil edilib, lakin təsirin həqiqi dərəcəsi və bərpa prosesi barədə daha dəqiq məlumatlar ortaya çıxdıqca proqnozlar yenidən nəzərdən keçirilə bilər.
Bölmənin digər xəbərləri
