Yaxın vaxtlarda Pakistanda TAPİ qaz kəmərinin çəkilişinə başlayacaqlar
Bakı, 15 may, AZƏRTAC
Türkmənistan-Əfqanıstan-Pakistan-Hindistan (TAPİ) transmilli qaz kəmərinin Pakistana aid 819 kilometrlik seqmentində qaynaq işləri yaxın iki ay ərzində başlana bilər.
AZƏRTAC bu barədə Türkmənistan neft-qaz kompleksinin elektron qəzetinə istinadla xəbər verir.
Pakistanda çıxan Dawn qəzeti Inter State Gas Systems (ISGS) layihəsinin iştirakçısı olan şirkətin yüksəkvəzifəli məmurlarına istinadla yazır ki, Pakistan ərazisində TAPİ boru kəmərinin çəkilişi cari ilin iyun ayında və ya iyulun ortalarında başlanacaq. Layihəyə cəlb edilmiş podratçı və mütəxəssislər Belucistan əyalətindəki Çaman və Kvetta yaşayış məntəqələrində keçiriləcək mərasimdə səfərbər edilib.
İSGS geotexniki hesabatın, radar və topoqrafik çəkilişlərin hazırlanması üzrə Pakistan tərəfindən aparılan işlərin tamamlanmasını təsdiq edib. Maliyyə məsələləri də tənzimlənib.
Qaz magistralının Türkmənistana aid hissəsi son mərhələdədir. Əfqanıstanda layihənin praktiki hissəsinə fevralın axırlarında start verilib. Burada iki kompressor stansiyasının qurulması davam edir. Hindistanda da müxtəlif hazırlıq işləri aparılır.
Bölmənin digər xəbərləri
