YENİ BALIQYETİŞDİRMƏ ZAVODU XƏZƏRDƏ NƏRƏ BALIĞI EHTİYATLARINI ARTIRMAĞA İMKAN VERƏCƏK
Avqust ayında Neftçala rayonunda balıqyetişdirmə zavodunun istifadəyə verilməsi nəzərdə tutulmuşdur. Zavod ildə 15 milyon körpə nərə balığı yetişdirəcəkdir. Ekologiya və Təbii Sərvətlər Nazirliyindən AZƏRTAC-ın müxbirinə bildirmişlər ki, zavodun tikintisi Dünya Bankının maliyyələşdirdiyi “Təxirəsalınmaz ekoloji sərmayələr” layihəsi çərçivəsində həyata keçirilir. Tikintiyə 9 milyon dollar vəsait ayrılmışdır. Mütəxəssislərin fikrincə, yeni zavod Xəzərdə nərə balığı ehtiyatlarını artırmağa imkan verəcəkdir. Belə ki, bu zavodlarda körpə yetişdirilən balıqların yaşama göstəriciləri təbii şəraitdəkindən xeyli yüksəkdir. Əvvəllər Azərbaycanda 3 balıqyetişdirmə zavodu var idi. Kür çayı və onun deltası sahilində yerləşən və ildə 12 milyon körpə balıq yetişdirən bu zavodlar körpə ağbalıq və nərə balıqları yetişdirilməsində ixtisaslaşmışdılar. Lakin Xəzərin səviyyəsinin qalxması üzündən həmin zavodların 2-si istehsalı dayandırmalı olmuşdur.
Bölmənin digər xəbərləri
