YUBİLEY VERNİSAJI
AZƏRTAC xəbər verir ki, aprelin 10-da Səttar Bəhlulzadə adına Dövlət Rəsm Qalereyasında Azərbaycanın əməkdar rəssamı İsmayıl Məmmədovun 60 illik yubileyinə həsr olunmuş fərdi sərgisi açılacaqdır. Həmin axşam sərgiyə yubilyarın çoxsaylı həmkarları, dostları və yaradıcılığının pərəstişkarları, dövlət qurumlarının, diplomatik korpusun nümayəndələri, jurnalistlər gələcəklər.
Sərginin təşkilatçıları Mədəniyyət və Turizm Nazirliyi, Rəssamlar İttifaqı, “İçərişəhər” Dövlət Tarix-Memarlıq Qoruğu İdarəsidir. Ekspozisiyada rəssamın rəngkarlıq, qrafika, səhnə qrafikası, teatr kostyumları və sair janrlarda çəkilmiş əsərləri təqdim olunacaqdır. Çap məhsulları arasında ölkəmizin tarix-memarlıq abidələrinin geniş coğrafiyasını əks etdirən “İçərişəhər”, “Bakı-Mərkəz”, “Abşeron” və “Azərbaycan” orijinal rəsm xəritələri xüsusi yer tutur. Yubiley münasibətilə nəşr olunmuş 34 kitabçadan ibarət kataloqa rəssamın 600-dən çox əsəri daxil edilmişdir.
Açılış günü sərgiyə gələnlərə yubilyarın müxtəlif illərdə çəkdiyi əsərlərdən ibarət çap məhsulları hədiyyə ediləcəkdir.
Bölmənin digər xəbərləri
