YUNANISTAN AZƏRBAYCANLA BÜTÜN SAHƏLƏRDƏ ƏMƏKDAŞLIĞA BÖYÜK ƏHƏMİYYƏT VERİR
Martın 31-də Azərbaycanın xarici işlər naziri Vilayət Quliyev Yunanıstanın ölkəmizdəki səfiri Merkurios Karafotias ilə görüşmüşdür.
Nazirliyin mətbuat mərkəzindən AZƏRTAC-a bildirmişlər ki, görüşdə nazir və səfir İraq ətrafında yaranmış vəziyyətlə əlaqədar ətraflı fikir mübadiləsi aparmışlar.
Hazırda Avropa Birliyinin sədri olan Yunanıstanın ölkəmizdəki səfiri Merkurios Karafotias bu qurumun İraqla bağlı mövqeyini nazir Vilayət Quliyevin diqqətinə çatdıraraq, hərbi əməliyyatların mümkün qədər qısa zamanda başa çatdırılması və sülhün əldə olunması istiqamətində BMT-yə üzv dövlətlərin birgə səylərinin, beynəlxalq təşkilatlar çərçivəsində humanitar yardımların həyata keçirilməsinin zəruriliyini vurğulamışdır.
Sonra səfir ölkələrimiz arasındakı dostluq münasibətlərini yüksək qiymətləndirmiş, Yunanıstanın Azərbaycanla bütün sahələrdə əməkdaşlığın inkişafına böyük əhəmiyyət verdiyini və sədrlik etdiyi təşkilatla əlaqələrinin bundan sonra da davam etdiriləcəyinə ümidvar olduğunu bildirmişdir.
Nazir Vilayət Quliyev Avropa Birliyi ilə Azərbaycan arasındakı əlaqələrin möhkəmlənməsi istiqamətində səfirin fəaliyyətini yüksək dəyərləndirmiş və ölkəmizin bu təşkilatla əməkdaşlığın genişlənməsinə, o cümlədən iki ölkə arasındakı əlaqələrin daha intensiv şəkildə davam etdirilməsinə tərəfdar olduğunu bildirmişdir.
Görüş zamanı qarşılıqlı maraq doğuran bir sıra digər məsələlər də müzakirə olunmuşdur.
Bölmənin digər xəbərləri
