Yunanıstan mediası Azərbaycan diasporunun Şuşaya səfərindən yazıb
Bakı, 19 avqust, AZƏRTAC
“Qala” Yunanıstan-Azərbaycan Dostluq Cəmiyyətinin təşəbbüsü ilə bu ölkənin “Karfitsa” xəbər portalında “Şuşa: Azərbaycanın mədəniyyət paytaxtı” sərlövhəli məqalə dərc olunub.
Bu barədə AZƏRTAC-a Diasporla İş üzrə Dövlət Komitəsinin mətbuat xidmətindən bildirilib.
Məqaləni qələmə alan “Qala” Yunanıstan-Azərbaycan Dostluq Cəmiyyətinin sədri Rəşid Məmmədov qeyd edib ki, Azərbaycana işgüzar səfəri zamanı 30 il sonra Şuşaya getmək və qədim şəhərimizi görmək ona nəsib olub.
Şuşada aldığı ilk təəssüratı müəllif belə ifadə edib: “Şuşaya çatanda qışqırmaq istədim: “Əziz Şuşa, sən Azadsan! Bu gün xaricdən səninlə görüşmək, səni ziyarət etmək üçün gəldik". Çünki dünyanın müxtəlif yerlərində yaşayan soydaşlarımızla birlikdə bu torpaqların azadlığı, uzun illər ərzində itirilmiş Qarabağın ruhunun bərpası uğrunda apardığımız mübarizə nəticəsində ortaq səyahətə qatılmaq məni duyğulandırdı.
Qarabağın və onun ürəyi olan Şuşanın dünyanı heyrətləndirəcək zəngin turizm potensialına malik olduğunu vurğulayan müəllif səfər zamanı gördüyü tarixi-mədəni abidələrdən, Azərbaycan Prezidentinin fərman və sərəncamları ilə burada bərpa işlərinə başlanılmasından bəhs edib. “Şuşa Allahın sevimli şəhəri sayıla bilər və bir sıra Azərbaycan ziyalılarının, o cümlədən şair və yazıçıların vətənidir. Şuşa azad edildikdən dərhal sonra Azərbaycan Prezidenti İlham Əliyev onu Azərbaycanın mədəniyyət paytaxtı elan etdi”, - deyə cəmiyyətin sədri bildirib.
Bölmənin digər xəbərləri
