ZAQATALADA “QAFQAZ MARALLARININ MÜHAFİZƏSİ” LAYİHƏSİ ÇƏRÇİVƏSİNDƏ SEMİNAR KEÇİRİLMİŞDİR
Zaqatala Regional Təbii Sərvətlər İdarəsindən AZƏRTAC-ın müxbirinə bildirmişlər ki, layihənin icrası ilə əlaqədar bu rayonda idarənin, eləcə də Azərbaycan Milli Elmlər Akademiyası Zoologiya İnstitutunun, Zaqatala və İlisu dövlət təbiət qoruqları əməkdaşlarının iştirakı ilə seminar keçirilmişdir. Seminarda qonşu Gürcüstanla həmsərhəd sahədən başlayaraq, Qax rayonunun bir hissəsi də daxil olmaqla, dağlıq zonanın 60 min hektara yaxın meşə ərazilərində Qafqaz marallarının yayıldığı biotoplar, onların bioekoloji xüsusiyyətləri və say artımının vəziyyəti araşdırılmışdır. Bu məqsədlə həmin ərazidə relyef şəraiti nəzərə alınmaqla, 10 stasionar müşahidə məntəqəsi seçilmişdir. İlkin müşahidələrə görə, ərazidə 290 baş maralın, o cümlədən 58 balanın olduğu müəyyənləşdirilmişdir.
Gələcəkdə həmin layihə çərçivəsində işlərin davam etdirilməsi və təbiəti mühafizə sahəsində beynəlxalq əməkdaşlığın daha da genişləndirilməsi nəzərdə tutulur.
Bölmənin digər xəbərləri
