ZAQATALADA YAZLIQ BİTKİLƏRİN ƏKİNİNƏ BAŞLANILMIŞDIR
Zaqatala, 28 mart (AZƏRTAC). Zaqatala rayonunun şəxsi və fermer təsərrüfatlarında bir neçə gündür ki, yazlıq bitkilərin əkininə başlanmışdır. Havaların isti, mülayim keçməsi yazlıqların əkininə müsbət təsir göstərir. Rayon icra hakimiyyətinin aqrar məsələlər şöbəsindən verilən məlumata görə, indiyədək təsərrüfatlarda 3445 hektar sahədə yazlıq bitkilərin əkini həyata keçirilmişdir. Bu, keçən ilin müvafiq dövrü ilə müqayisədə xeyli çoxdur. Fermerlər 210 hektar sahədə qarğıdalı, 995 hektarda kartof, 660 hektarda tərəvəz əkmiş, 1560 hektar sahəyə yonca səpmişlər. Ümumiyyətlə, cari ildə rayonda 10 min 100 hektar sahədə yazlıq bitkilərin əkini nəzərdə tutulur.
Bundan əlavə, hazırda təsərrüfatlarda taxıl sahələrinə aqrotexniki xidmət işləri davam etdirilir, sahələrə yemləmə gübrələri verilir, zərərvericilərə qarşı mübarizə tədbirləri həyata keçirilir.
Bölmənin digər xəbərləri
