Zərifə Quliyeva: Əbədiləşən Özbəkistan-Azərbaycan dostluğu iki qardaş xalqın münasibətlərini yeni mərhələyə yüksəldir
Ankara, 24 avqust, AZƏRTAC
Prezident İlham Əliyevin Özbəkistana dövlət səfəri iki qardaş ölkə arasında münasibətlərin yeni mərhələyə yüksəldiyini bir daha nümayiş etdirib. Səfər çərçivəsində keçirilən görüşlər, Ali Dövlətlərarası Şuranın üçüncü iclası, imzalanan sənədlər və əldə olunan razılaşmalar Azərbaycan–Özbəkistan əməkdaşlığının genişləndiyini göstərib. Səfərin mühüm nəticələrindən biri Azərbaycan və Özbəkistan arasında “Əbədi dostluq haqqında Müqavilə”nin imzalanması olub. Dövlət başçılarının qarşılıqlı yüksək dövlət təltifləri ilə təltif olunması da iki ölkə arasında dostluq və qarşılıqlı etimadın yüksək səviyyəsinin göstəricisi kimi diqqət çəkib.
Mövzu ilə bağlı “Modern İnkişaf və Ailə” İctimai Birliyinin sədri, YAP Veteranlar Şurasının üzvü Zərifə Quliyeva AZƏRTAC-a bildirib ki, bu səfər Azərbaycan–Özbəkistan münasibətlərinin tarixində xüsusi əhəmiyyət daşıyır.
Zərifə Quliyevanın sözlərinə görə, “Əbədi dostluq haqqında Müqavilə” yalnız siyasi sənəd deyil, iki xalqı birləşdirən ümumi tarixin, mədəniyyətin və mənəvi dəyərlərin ifadəsidir. Onun fikrincə, sənəd gələcək nəsillər üçün Azərbaycan və Özbəkistan arasında dostluğun möhkəm hüquqi-siyasi əsasını yaradır.
Zərifə Quliyeva qeyd edib ki, Özbəkistan Azərbaycanın əldə etdiyi uğurlara hər zaman səmimi münasibət göstərib. Torpaqların işğaldan azad edilməsindən sonra həyata keçirilən genişmiqyaslı quruculuq işlərinə qardaş ölkənin dəstəyi də iki xalq arasında qardaşlığın real nümunəsidir. O bildirib ki, ticarət, investisiya, sənaye kooperasiyası, energetika və nəqliyyat sahələrində əməkdaşlığın genişləndirilməsi üçün böyük potensial mövcuddur. Trans-Xəzər nəqliyyat dəhlizinin imkanlarından birgə istifadə edilməsi isə Mərkəzi Asiya ilə Cənubi Qafqaz arasında iqtisadi əlaqələrin inkişafına mühüm töhfə verə bilər.
O, mədəni-humanitar əlaqələrin də xüsusi əhəmiyyət daşıdığını vurğulayıb. Qeyd edib ki, Azərbaycan və Özbəkistanı birləşdirən ortaq tarix, mədəniyyət və mənəvi dəyərlər xalqlarımızın daha da yaxınlaşmasına xidmət edir.
“Modern İnkişaf və Ailə” İctimai Birliyinin sədrinin sözlərinə görə, Azərbaycanın Mərkəzi Asiya Dövlət Başçılarının Məşvərət Görüşləri formatına qoşulması da regional əməkdaşlıq baxımından mühüm addımdır. Bu proses Mərkəzi Asiya ilə Cənubi Qafqaz arasında etimad, mehriban qonşuluq və qarşılıqlı bağlılığın daha da güclənməsinə imkan yaradır.
“Əminəm ki, Azərbaycan–Özbəkistan dostluğu bundan sonra daha da möhkəmlənəcək. Çünki münasibətlərimizin əsasında yalnız siyasi maraqlar deyil, ümumi tarix, qardaşlıq, qarşılıqlı hörmət və mənəvi yaxınlıq dayanır. “Əbədi dostluq haqqında Müqavilə” bu dostluğun gələcək nəsillər üçün də əbədiləşdirilməsinin mühüm ifadəsidir”, – deyə Zərifə Quliyeva vurğulayıb.
Bölmənin digər xəbərləri
