ZEYNAL CABBARZADƏNİN XATİRƏ LÖVHƏSİ AÇILMIŞDIR
AZƏRTAC xəbər verir ki, aprelin 27-də tanınmış şair və publisist Zeynal Cabbarzadənin vaxtilə yaşadığı Puşkin küçəsindəki 12 nömrəli evdə xatirə lövhəsi açılmışdır. Mədəniyyət və turizm naziri Əbülfəs Qarayev mərasimdə çıxış edərək bildirmişdir ki, Azərbaycan Prezidenti İlham Əliyevin Sərəncamına, uyğun olaraq son illər paytaxtımızda bir sıra abidələr bərpa olunur, tanınmış mədəniyyət və incəsənət xadimlərinin xatirə lövhələri açılır.
Zeynal Cabbarzadə müasir Azərbaycan jurnalistikasının inkişafına dəyərli töhfə vermiş, sıravi müxbirdən baş redaktoradək yol keçmişdir. Onun şeirlərinə Səid Rüstəmov, Tofiq Quliyev, Cahangir Cahangirov və digər məşhur bəstəkarlar mahnılar yazmışlar.
Yazıçılar Birliyinin sədri Anar, Azərbaycan Ədəbiyyatı Muzeyinin direktoru, Milli Məclisin deputatı Rafael Hüseynov uzun illər “Pioner” jurnalının baş redaktoru olmuş Zeynal Cabbarzadə haqqında xatirələrini danışmış, onun uşaq ədəbiyyatının inkişafında xidmətlərini qeyd etmişlər.
Z.Cabbarzadənin oğlu İlqar Cabbarzadə atasının xatirəsinə göstərilən ehtirama görə ölkə rəhbərliyinə, barelyefin müəllifi, xalq rəssamı Natiq Əliyevə, mərasim iştirakçılarına təşəkkürünü bildirmişdir.
Bölmənin digər xəbərləri
