Müstəqillik Günündə Qarabağa səfər dövlət-xalq birliyinin ən parlaq nümunəsidir - ŞƏRH
Bakı, 29 may, AZƏRTAC
Prezident İlham Əliyevin Qarabağ və Şərqi Zəngəzura hər səfəri xüsusi əhəmiyyət kəsb edir. Bu dəfəki səfəri xüsusi edən əsas məqam onun məhz Müstəqillik Günündə və Qurban bayramı ərəfəsində baş tutmasıdır. Bayram günündə dövlətimizin başçısının kənd sakinləri və yerli əhali ilə səmimi dialoqunun şahidi olduq. Bu, ilk növbədə, xalqın dövlət başçısına olan dəstəyinin və səmimi sevgisinin göstəricisidir.
Bu sözləri AZƏRTAC-a açıqlamasında Milli Məclisin İqtisadi siyasət, sənaye və sahibkarlıq komitəsi sədrinin müavini Azər Badamov söyləyib.
O deyib: "Görülən işlərin miqyası və əhali üçün yaradılan şərait onu göstərir ki, Qarabağ və Şərqi Zəngəzurun qısa müddətdə bərpası dövlətimizin başçısının xüsusi həssaslıqla yanaşdığı prioritet məsələlərdəndir. Səfər çərçivəsində Prezident İlham Əliyev tarixə də ekskursiya edərək Azərbaycanın keçdiyi keşməkeşli yola bir daha nəzər saldı. Şübhəsiz ki, vaxtilə hakimiyyətdə boşluq yaranmasaydı, şəxsi ambisiyalar kənara qoyulub hərc-mərcliyin qarşısı alınsaydı, Azərbaycan torpaqları işğala məruz qalmazdı. Məhz daxildə baş verən xaos nəticəsində biz tədricən həm müstəqilliyimizdən, həm də müstəqil qərarvermə imkanlarımızdan uzaq düşmüşdük.
Bu gün əldə olunan nəticələr bir daha göstərir ki, müstəqillik böyük nemət və mühüm nailiyyətdir. Azərbaycan bu gün sözdə deyil, əməldə müstəqil siyasət yürüdür. Necə ki, Ümummilli Lider Heydər Əliyev bildirirdi: “Biz özümüz öz taleyimizin sahibiyik”. Prezident İlham Əliyevin həyata keçirdiyi siyasət də onu göstərir ki, atılan hər bir addım dövlətin və xalqın maraqlarına xidmət edir".
Deputat qeyd edib ki, İkinci Qarabağ müharibəsində qazanılan Zəfər və antiterror tədbirləri zamanı əldə edilən nəticələr Azərbaycan xalqının sarsılmaz iradəsinin bariz nümunəsidir. Bu gün Qarabağ və Şərqi Zəngəzur yenidən qurulur. Qürurverici məqam ondan ibarətdir ki, bu yenidənqurma prosesində dövlətlə xalqın həmrəyliyinin şahidi oluruq.
Azərbaycan iqtisadiyyatı dünya iqtisadiyyatına inteqrasiya olunur. Görülən işlər həm daxili bazar, həm də ixrac imkanlarının genişləndirilməsi baxımından mühüm əhəmiyyət daşıyır. Atılan bütün addımlar Qarabağın və ümumilikdə Azərbaycan iqtisadiyyatının dünyaya açılması deməkdir.
Yeni müəssisələrin yaradılması məşğulluğun təmin olunması baxımından da xüsusi önəm daşıyır. Bu, təkcə Qarabağa qayıdan əhali üçün deyil, digər rayonlardan olan vətəndaşlar üçün də yeni imkanlar yaradır. Dövlət tərəfindən müəssisələrin davamlı fəaliyyətinə hərtərəfli dəstək göstərilir. Belə ki, onlara güzəştli kreditlər ayrılır, eyni zamanda, özəl investisiyalar təşviq olunur. Bu proses zəncirvari şəkildə sənayenin inkişafına, yerli istehsalın təşviqinə, ixrac potensialının genişlənməsinə, idxaldan asılılığın azalmasına və məşğulluğun artmasına xidmət edir. Bu, iqtisadi dayanıqlılıq deməkdir.
"Özəl investorlar üçün geniş imkanların yaradılması da Prezident İlham Əliyevin göstərişləri əsasında həyata keçirilir. Bu isə özəl sektor üçün risklərin minimuma endirilməsi baxımından mühüm əhəmiyyət daşıyır. Müəssisələrin xammal tədarükünün daxili bazar hesabına təmin olunması isə özünü təmin edən iqtisadiyyatın formalaşmasına ciddi töhfə verir.
Müasir dövrdə dünya əvvəlkindən daha sıx şəkildə bir-biri ilə əlaqəlidir. Məhsul və ticarətlə yanaşı, ideya və mədəniyyətlərin də beynəlxalq inteqrasiyası prosesi gedir. Bu məqamda vurğulamaq yerinə düşər ki, Azərbaycan bu gün bərpa və quruculuq mədəniyyəti nümayiş etdirir. Mədəni təsirlər isə inkişafı təşviq edən mühüm amillərdəndir.
Bununla yanaşı, qlobal iqtisadi mühitdə sənayeləşmə strategiyalarının düzgün müəyyənləşdirilməsi xüsusi əhəmiyyət daşıyır. Bu strategiyalar yerli ekoloji və iqtisadi amillərə əsaslanır ki, nəticədə miqyas iqtisadiyyatı güclənir və ölkələrə rəqabət üstünlüyü qazandırır. Azərbaycan da bu istiqamətdə əzmlə irəliləyir və artıq rəqabət üstünlüyü prinsipi əsasında fəaliyyət göstərmək imkanına malikdir.
Bu gün hər bir istehsal vahidi üzrə məhsuldarlığın artdığı müşahidə olunur. Regionda həyata keçirilən inkişaf çoxşaxəlidir. Texniki və institusional mexanizmlərdə aparılan dəyişikliklər də ümumi inkişafa müsbət təsir göstərir. Ənənəvi üsullardan deyil, istehsalı daha yüksək səviyyəyə qaldıran müasir texnologiyalardan istifadə olunur.
İqtisadi sabitliyin uzunmüddətli qorunması və dayanıqlı inkişaf məqsədlərinin təmin edilməsi istiqamətində artıq konkret nəticələr əldə olunub. Şuşa-Laçın yolunun genişləndirilməsi, tunellərin inşası turizmin inkişafı əldə olunan çoxşaxəli nailiyyətlərin göstəricisidir.
Qarabağ və Şərqi Zəngəzurda həyata keçirilən layihələr kommunikasiya idarəçiliyinin yüksək əhəmiyyətini də ortaya qoyur. Nəzərə alsaq ki, kommunikasiya layihə idarəetmə planının əsas elementlərindən biridir və məqsəd maraqlı tərəflərin tələblərini qarşılamaqla uğurlu layihələrin icrasını təmin etməkdir, qeyd edilməlidir ki, Azərbaycanda dövlət qurumları arasında koordinasiya və dövlət-özəl tərəfdaşlığı yüksək səviyyədədir.
Bütövlükdə dövlətimizin başçısının Qarabağ və Şərqi Zəngəzurun hər qarışına səfər etməsi, görülən işlərlə şəxsən tanış olması və prosesə birbaşa nəzarət etməsi təqdirəlayiqdir. Xüsusilə Müstəqillik Günündə və Qurban bayramı ərəfəsində Müzəffər Ali Baş Komandanımızın Xankəndi şəhərindəki Zəfər parkında ucaldılan Zəfər tağının önünə gül dəstəsi qoyması xalqımız tərəfindən yüksək rəğbətlə qarşılanır və böyük qürur hissi doğurur",- deyə A. Badamov vurğulayıb.
Bölmənin digər xəbərləri
