Sənət, ruh və rənglərin harmoniyası: samuxlu rəssamın yaradıcılıq dünyası
Samux, 29 may, AZƏRTAC
Bəzən rənglər sözlərdən daha güclü danışır, çünki onlar birbaşa hisslərə toxunur, izah tələb etmir. Bu dərin emosional dili ən incə şəkildə duyan və onu başqalarına ötürməyi bacaran gənc rəssamlardan biri də Fəridə Rzayevadır. O, gördüyü təsvirləri təkcə müşahidə etmir, həm də onları daxili dünyasından süzərək rənglərin, formaların və xəyalların harmoniyasında yenidən yaradır. Fəridənin yaradıcılığında hər tablo bir duyğunun nəfəsi, hər rəng keçidi isə görünməyən bir hekayənin səssiz davamıdır.
AZƏRTAC-ın bölgə müxbiri Samux rayon sakini Fəridə Rzayeva ilə həmsöhbət olaraq onun yaradıcılığı, sənətə baxışı və rənglər dünyasında formalaşdırdığı estetik mühit haqqında söhbət edib.
Gənc rəssamın sözlərinə görə, onun üçün rəsm çəkmək sadəcə yaradıcılıq deyil, həm də özünü ifadə etməyin ən səmimi yoludur. Bu yola kiçik yaşlarından çıxsa da, hələ qət etməli olduğu uzun məsafələr var. “Rusiyada anadan olsam da, məktəbə Samuxda getmişən. Yaradıcılığa, sənətə böyük hörmət və sevgi olan mühitdə böyümüşəm. Atam istedadlı insandır. Ondan ağac üzərində oyma, anamdan isə tikiş bacarıqlarını öyrənirdim. Rəsmlər çəkirdim, estetik duyumum formalaşırdı. Bacarıqlarımı inkişaf etdirmək üçün rəsm kurslarına getdim. 2018-2022-ci illərdə Azərbaycan Dövlət Rəssamlıq Akademiyasında “Rəngkarlıq” ixtisası üzrə təhsil aldım”, - deyən Fəridə Rzayeva bununla kifayətlənməyib. Türkiyənin Anadolu Universitetində magistr təhsili alaraq istedadını daha da cilalayıb. “Təhsillə yanaşı, həm Eskişehir, həm də İstanbulda ölkəmin mədəniyyətini layiqincə təmsil etməyə çalışmışam. Mədəniyyət günləri, bayramlar münasibətilə təşkil edilən tədbirlərdə əl işlərim sərgilənib, fərdi sərgim də açılıb. Universitetlərin xətti ilə yaradılan kurslarda gənclərə rəssamlığın sirlərini öyrətmişəm. Müəllimlərimdən, tələbələrimdən azərbaycanlıların çox istedadlı olduğu barədə fikirləri eşidəndə qürur hissi yaşamışam”, – deyən fırça ustasını fərəhləndirən başqa məqamlar da olub. “Gənclər və İdman Nazirliyinin layihəsi əsasında 10 jurnalist, 10 fotoqraf, 10 gənc rəssamın doğma Şuşa şəhərinə səfəri təşkil edilmişdi. O zaman yaratdığım əl işlərinə ölkəmizlə yanaşı, Eskişehir və İstanbuldakı sərgilərdə də xüsusi diqqət və sevgi ilə yanaşdılar. Mən azad edilmiş torpaqlarda yalnız mənzərə görməmişdim, o torpaqların yaddaşını, ağrısını və yenidən doğulan ruhunu hiss etmişdim. İnsanlara bu hissləri, Vətənimiz, şanlı qələbəmiz barədə geniş məlumatı ötürməyə çalışırdım”.
Fəridə Rzayeva yenə də azad edilmiş torpaqlamızda olaraq yeni əl işləri ərsəyə gətirmək arzusundadır. Deyir ki, rəssam üçün torpaq sadəcə məkan deyil, xatirə, kimlik və ruhdur. Kətan üzərində yağlı boya, kağız üzərində sulu boya, zəngin qara tonları və yumşaq keçidləri ilə fərqlənən kömürlə portret, mənzərə, məişət və natürmort janrlarında əl işləri ərsəyə gətirən gənc rəssam bundan sonrakı əsərlərini klassik təsviri sənətin rəqəmsal texnologiya ilə birləşməsi əsasında yaratmağa çalışır. Belə əl işlərindən ibarət şəxsi sərgisini təşkil etmək isə əsas hədəflərindəndir. “Artırılmış reallıq” rəsmləri hərəkətli, interaktiv vizual hekayələrə çevirən, həmçinin rəsm çəkmə prosesini asanlaşdıran innovativ texnologiyadır. Bu yanaşmada rəsm və ya tablo yalnız kətanda qalmır, xüsusi tətbiqlər vasitəsilə “canlanaraq” əlavə vizual elementlər qazanır. Tabloya telefon kamerası ilə baxanda ekran üzərində rəsm hərəkət etməyə başlayır, əlavə rəng qatları və effektlər görünür, sənətin içindən səs, animasiya və ya 3D elementlər çıxır”, - deyən Fəridə Rzayeva vurğulayır ki, bu texnologiya rəssamlığa yeni ifadə imkanları verir.
İzləyici sadəcə tabloya baxmır, onun içində yaşayan duyğularla qarşılaşır. Bu texnika əsərlərdə dərinlik yaratmaq üçün ideal vasitədir. Gənc qız doktorantura təhsili almağı, bundan başqa müəllimlik fəaliyyətini davam etdirməyi də planlaşdırır. Deyir ki, rəssam müəllim olanda yalnız rəngləri deyil, baxmağı, hiss etməyi və düşünməyi də öyrədir.
Müxbir – Vüsalə Cənnətova
Bölmənin digər xəbərləri
