Milli musiqi gecəsi - “Balabanın sehrində”
Bakı, 28 may, AZƏRTAC
Müslüm Maqomayev adına Azərbaycan Dövlət Akademik Filarmoniyasının Kamera və Orqan Musiqisi Zalı möhtəşəm bir musiqi gecəsinə ev sahibliyi edib. Tanınmış balaban ifaçısı Məqsəd Əzizovun "Balabanın sehrində” adlı solo konserti paytaxt sənətsevərlərinə unudulmaz anlar yaşadıb.
AZƏRTAC xəbər verir ki, musiqi proqramı janr zənginliyi ilə diqqət çəkib. Gecədə flamenko ritmləri, klassik musiqi inciləri, dünya kinosundan yaddaqalan bəstələr və bənzərsiz Azərbaycan muğamı milli musiqi alətimiz balabanın ecazkar sədaları altında yenidən canlanıb.
Məqsəd Əzizovu müşayiət edən "Balabançı" ansamblının milli geyimli üzvləri öz mahir ifaları ilə gecəyə xüsusi rəng qatıblar.
Konsert proqramında Üzeyir Hacıbəyli, Qara Qarayev, Arif Məlikov kimi dahi bəstəkarlarımızın əsərləri ilə yanaşı, dünya musiqisindən seçmələr, xalq mahnı və milli rəqslərimiz təqdim olunub.
Solistin, onun ansamblının, həmçinin istedadlı musiqiçilərin və rəqs kollektivinin möhtəşəm performansı sürəkli alqışlarla qarşılanıb.
Konsert boyu dinləyicilərə balaban, zurna və tütəkdə təqdim olunan rəngarəng proqram tamaşaçıları musiqi dünyasının zənginliklərinə səyahətə aparıb.
Musiqi gecəsini izləyənlər arasında Azərbaycanın tanınmış incəsənət xadimləri də yer alıb.
Qeyd edək ki, əslən Qərbi Azərbaycanın Göyçə mahalından olan, 1995-ci ildə Goranboyda doğulan Məqsəd Əzizov musiqi mədəniyyətimizin beynəlxalq arenada layiqincə təmsil edən istedadlı sənətçilərdəndir. Dünyaşöhrətli musiqiçi Sami Yusufun orkestr heyətində yer alan ifaçı sənət dünyasında özünəməxsus üslubu ilə seçilir. Təsadüfi deyil ki, Sami Yusuf öz rəsmi musiqi platformasında (whenpathsmeet.com) onu "Azərbaycan musiqisinin gənc səfiri" kimi təqdim edib.
Bölmənin digər xəbərləri
