Ermənistanın işğal altında olan Azərbaycan ərazilərindəki qeyri-qanuni fəaliyyətləri münaqişənin həllinə xələl gətirir VİDEO
Cenevrə, 9 aprel, AZƏRTAC
Aprelin 9-da BMT-nin Cenevrə Bölməsində Azərbaycan Respublikasının Cenevrədəki BMT Bölməsi və digər beynəlxalq təşkilatlar yanında daimi nümayəndəliyi BMT-nin Sülh Universiteti ilə birgə “Münaqişə ərazilərində qeyri-qanuni iqtisadi fəaliyyətlərin insan hüquqlarına təsirləri” mövzusunda beynəlxalq konfrans təşkil edib.
AZƏRTAC xəbər verir ki, konfransı açan Azərbaycanın daimi nümayəndəsi Vaqif Sadıqov tədbirin məqsədlərini qeyd edərək, münaqişə zonalarında qeyri-qanuni fəaliyyətin insan hüquqlarına təsirindən danışıb.
Tədbirin həmtəşkilatçısı olan BMT-nin Sülh üzrə Universitetinin rektoru Fransisko Roxas Aravena çıxış edərək, sülh olmadığı halda inkişaf və tərəqqinin də olmayacağını və qeyri-qanuni fəaliyyətlərin artacağını vurğulayıb.
Azərbaycan Respublikası Prezidenti Administrasiyasının xarici siyasət məsələləri şöbəsinin müdiri Hikmət Hacıyev çıxışında Azərbaycan ərazilərinin Ermənistan tərəfindən işğalı nəticəsində bu ərazilərdə qeyri-qanuni iqtisadi fəaliyyətlərin həyata keçirildiyini, resurslardan qeyri-qanuni istifadə edildiyini və məcburi köçkünlərin mülkiyyət hüquqlarının pozulduğunu qeyd edib. Bu xüsusda, bir sıra praktiki nümunələrə diqqəti çəkərək İsveçrənin tanınmış Frank Müller şirkətinin, eləcə də Airbnb beynəlxalq şirkətinin qanunsuz fəaliyyətlərindən bəhs edib. O qeyd edib ki, Ermənistanın Azərbaycan ərazilərində həyata keçirdiyi qeyri-qanuni fəaliyyətlər münaqişənin danışıqlar yolu ilə həllinə xələl gətirir və münaqişənin uzanmasına xidmət edir. Şöbə müdiri, eyni zamanda, Azərbaycanın münaqişə ərazilərində qeyri-qanuni fəaliyyətlər mövzusunun inkişafına və aktuallaşmasına fəal surətdə töhfə verdiyini vurğulayıb.
Konfrans İtaliya, İsveçrə, Niderland, Böyük Britaniya və Azərbaycandan müvafiq ekspertlərin iştirakı ilə iki işçi sessiyada keçirilib. Tədbir zamanı, həmçinin Anqola, Azərbaycan, Konqo və Syera-Leonedə sözügedən sahədə mövcud olan vəziyyət bu ölkələrin nümayəndələri tərəfindən diqqətə çatdırılıb.
Münaqişə ərazilərində qeyri-qanuni iqtisadi fəaliyyətin və onun insan hüquqlarına təsirlərinin aradan qaldırılması ilə bağlı mövcud beynəlxalq hüquqi çərçivənin müzakirəsinə həsr edilmiş ilk sessiyada çıxış edən məruzəçilər münaqişə zonalarında qeyri-qanuni fəaliyyət göstərən şirkətlərə görə müvafiq dövlətlərin məsuliyyət daşıdığını vurğulayıblar. Çıxışlar zamanı bu sahədə məcburi xarakter daşıyan konkret mexanizmin qəbul edilməsinin zəruriliyi qeyd olunub. Bu sessiyada, həmçinin məruzəçilər tərəfindən Ermənistanın Azərbaycan ərazilərinin işğalı ilə bağlı BMT Təhlükəsizlik Şurası tərəfindən qəbul edilmiş qətnamələr, Avropa İnsan Hüquqları Məhkəməsinin “Çiraqov və digərləri Ermənistana qarşı” işi ilə bağlı qərarı, işğal olunmuş ərazilərə qeyri-qanuni pul köçürmələri, insanların məskunlaşdırılması və digər məsələlərlə bağlı fikirlər səsləndirilib.
Münaqişə ərazilərində qeyri-qanuni iqtisadi fəaliyyətlə bağlı üçüncü tərəflərin öhdəliklərinə həsr edilmiş ikinci sessiyada isə məruzəçilər işğal olunmuş ərazilərdə yaradılan qeyri-qanuni rejimlərin tanınmaması ilə bağlı digər ölkələrin məsuliyyətinin olduğunu qeyd ediblər. Bu sessiyada “Azərkosmos” ASC-nin peyk vasitəsilə çəkdiyi, Azərbaycan Respublikasının işğal olunmuş ərazilərində işğalçı Ermənistan tərəfindən qeyri-qanuni iqtisadi fəaliyyətin aparılmasını, ətraf mühitə ziyanın vurulmasını, meşələrin yandırılmasını və s. nümayiş etdirən görüntülər təqdim edilib. Bu işçi sessiyada münaqişə zonalarında maddi-mədəni irsin dağıdılması məsələsi də müzakirə olunaraq, Ermənistan tərəfindən Azərbaycanın işğal olunmuş ərazilərində Azərbaycan izinin silinməsi istiqamətində məqsədyönlü şəkildə siyasətin aparıldığı barədə məlumat verilib.
Tədbirdə Cenevrədəki BMT bölməsi yanında akkreditə olunmuş daimi nümayəndəliklər, mövzu üzrə tədqiqat aparan beynəlxalq hüquqşünaslar və qeyri-hökumət təşkilatlarından olan 120-dən çox nümayəndə iştirak edib.
Elgün Niftəli
AZƏRTAC-ın xüsusi müxbiri
Cenevrə
Bölmənin digər xəbərləri
