1939-cu ildə istehsal olunan “Alfa Romeo” hərracda 16,7 milyon avroya satılıb
Bakı, 11 fevral, AZƏRTAC
1939-cu ildə istehsal olunan nadir “Alfa Romeo 8C 2900 B Touring Berlinetta” avtomobili Parisdə keçirilən qədim avtomobillər hərracında 16,7 milyon avroya satılıb.
AZƏRTAC Fransa KİV-lərinə istinadla xəbər verir ki, amerikalı kolleksiyaçının satın aldığı avtomobil əla vəziyyətdə olub və istehsal edildiyi vaxtdan indiyədək cəmi 65 min kilometr məsafə qət edib.
“Artcurial” satış evi tərəfindən təşkil olunan “Retromobile” sərgisində ümumilikdə 150 avtomobil nümayiş edilib. Onların arasında 1953-cü ildə istehsal edilən “Maserati”, 1960-cı illərin “Ferrari”, 1962-ci ilin “Aston Martin” avtomobilləri və bir sıra başqa bahalı avtomobillər yer alıb.
Qeyd edək ki, “Alfa Romeo 8C 2900 B Touring Berlinetta” avtomobilindən cəmi 50 ədəd istehsal edilsə də, onlardan yalnız 5-i bizim dövrümüzə qədər gəlib çatıb.
Bölmənin digər xəbərləri
