SİYASƏT
Azərbaycanda informasiya cəmiyyətinin inkişafında dövlət, dini və ictimai institutlar arasında qarşılıqlı təcrübədən danışılıb
![](/files/galleryphoto/2021/3/1200x630/1640273372234054396_1200x630.jpg)
![](/files/galleryphoto/2021/3/1200x630/16402733723516748324_1200x630.jpg)
![](/files/galleryphoto/2021/3/1200x630/16402733726501346990_1200x630.jpg)
![](/files/galleryphoto/2021/3/1200x630/16402733724734031037_1200x630.jpg)
![](/files/galleryphoto/2021/3/1200x630/16402733724207563839_1200x630.jpg)
![](/files/galleryphoto/2021/3/1200x630/16402733724293825447_1200x630.jpg)
Bakı, 23 dekabr, AZƏRTAC
MDB PA Demokratiyanın, parlamentarizmin inkişafının və vətəndaşların seçki hüquqlarına riayət olunmasının monitorinqi beynəlxalq institutunun (MDB PA DİMBİ) Bakı filialı dekabrın 23-də “Azərbaycan Respublikasında informasiya cəmiyyətinin inkişafı: dövlət, dini və ictimai institutlar arasında qarşılıqlı təcrübə” adlı videokonfrans keçirib.
Qurumun mətbuat xidmətindən AZƏRTAC-a bildirilib ki, videokonfransda Azərbaycan Respublikası Milli Məclisinin deputatı Nizami Səfərov, MDB PA DİMBİ-nin Bakı filialının direktoru Teymur Muradov, Milli Məclisin MDB PA-da səlahiyyətli nümayəndəsi Aydın Cəfərov, MDB PA DİMBİ-nin direktoru İvan Muşket, Kişinyov filialının direktoru Yeugeniu Ştirbu, Bişkek filialının direktoru İslambəy Mursabəyov, “Yeni Azərbaycan” qəzetinin baş redaktoru Alqış Musayev, Azərbaycan Respublikasının Rəqəmsal İnkişaf və Nəqliyyat Nazirliyində Beynəlxalq təşkilatlarla iş sektorunun müdiri Emil Əhmədov, Dini Qurumlarla iş üzrə Dövlət Komitəsinin nümayəndəsi Səfər Səfərli, AMEA Hüquq və İnsan Haqları İnstitutunun Beynəlxalq əlaqələr şöbəsinin rəhbəri Cahangir Cahangirli, həmin İnstitutun daha bir nümayəndəsi Moisey Bekker, Qərbi Kaspi Universitetinin proqramlaşdırma və informasiya təhlükəsizliyi kafedrasının müdiri Fariz Həsənli, politoloq Sultan Zahidov, Azərbaycan Respublikasının QHT-yə Dövlət Dəstəyi Agentliyinin nümayəndəsi, ictimaiyyət, elm xadimləri və MDB PA DİMBİ və onun Bakı filialının əməkdaşları iştirak ediblər.
MDB PA DİMBİ Bakı filialının direktoru Teymur Muradov videokonfransı açaraq filial tərəfindən cari ildə “Azərbaycan Respublikasında informasiya cəmiyyətinin inkişafı: dövlət, dini və ictimai institutlar arasında qarşılıqlı təcrübə” adlı elmi-araşdırma işinin aparıldığını və bu prosesə AMEA-nın Hüquq və İnsan Haqları İnstitutunun alimlərinin də cəlb olunduğunu, eləcə də mövzunun aktuallığı və Azərbaycan Respublikasında müvafiq sahədə həyata keçirilən islahatlar, nailiyyətlər barədə iştirakçıları məlumatlandırıb.
Tədbirdə Azərbaycan Respublikası Milli Məclisinin MDB PA-da səlahiyyətli nümayəndəsi Aydın Cəfərov MDB PA Şurasının Baş Katibi D.A.Kobitski və şəxsən öz adından tədbir iştirakçılarını salamlayıb. Daha sonra çıxış edən MDB PA DİMBİ direktoru İvan İliç Muşket tədbirin mövzusunun tək Azərbaycan Respublikasında deyil, eyni zamanda, bütün MDB məkanında aktuallığından danışıb, mövzunun müasir dövr üçün daşıdığı əhəmiyyət barədə fikirlərini bölüşüb.
Tədbirdə çıxış edən Milli Məclisin deputatı Nizami Səfərov Azərbaycan Respublikasında informasiya cəmiyyətinin inkişafında dövlət, dini və ictimai institutlar arasında qarşılıqlı təcrübə və bu sahədə yaradılan normativ-hüquqi baza barədə fikirlərini səsləndirib.
Digər çıxışçılar təmsil etdikləri profillər üzrə informasiya cəmiyyəti, dövlət və dini təşkilatlar, dövlət və ictimai institutlar və digər mövzularda çıxışlar etdilər.
Videokonfrans qarşılıqlı diskussiya və maraqlı fikir mübadiləsi ilə yekunlaşıb.