2010-CU İLƏDƏK AZƏRBAYCANA 10 MİLYARD ABŞ DOLLARINAYAXIN XARİCİ İNVESTİSİYA QOYULACAQDIR

12.11.2006 [02:04]
Çap et
A⁺ A^-

Azərbaycan 1991-ci ildə dövlət müstəqilliyini bərpa edəndən bəri iqtisadiyyatın müxtəlif sahələrinə, ümumilikdə, 23 milyard ABŞ dollarından çox xarici investisiya cəlb edilmişdir. Əhalinin hər nəfərinə düşən xarici investisiyaların həcminə görə Azərbaycan nəinki postsovet məkanında, hətta Şərqi Avropa ölkələri arasında ən qabaqcıl yerlərdən birini tutur. Proqnozlara görə, 2010-cu ilədək Azərbaycan iqtisadiyyatına əlavə olaraq, 10 milyard dollara yaxın xarici investisiya qoyulacaqdır.

İqtisadi İnkişaf Nazirliyindən bildirmişlər ki, xarici investorların, beynəlxalq maliyyə təsisatlarının Azərbaycana bu marağının əsas səbəbi ölkəmizdə investorların hüquq və mənafelərinin qorunması, mülkiyyətin toxunulmazlığı, əldə edilmiş mənfəətdən maneəsiz istifadə olunması ilə bağlı əhəmiyyətli tədbirlərin görülməsi, bazar iqtisadiyyatı prinsipləri əsasında vahid valyuta məzənnəsinin formalaşmasıdır.

Xatırladaq ki, 2005-ci ildə “Fitch” beynəlxalq reytinq agentliyi Azərbaycanın kredit reytinqini Bb səviyyəsində qiymətləndirmişdir. Bu il daha bir beynəlxalq reytinq agentliyi-“Moody’s” Azərbaycanın reytinqini bir pillə qaldıraraq Ba1 səviyyəsində qiymətləndirmişdir.

Azərbaycan 25 ölkə ilə investisiyaların qarşılıqlı qorunması, 17 dövlət ilə ikiqat vergitutmanın aradan qaldırılması barədə sazişlər imzalamışdır.