20 YANVAR HAQQINDA HƏQİQƏTLƏRİ DÜNYAYA ÇATDIRAQ
Bakı, 12 yanvar (AZƏRTAC). Azərbaycanın gənclər təşkilatlarının nümayəndələri dünyanın müxtəlif ölkələrindən olan siyasətçilərin, konqresmenlərin, mədəniyyət xadimlərinin elektron ünvanlarına 10 mindən çox məktub göndərməyi planlaşdırır. Qanlı 20 Yanvar hadisələrinin 20-ci ildönümünə həsr olunmuş aksiyadan məqsəd sülhsevər Azərbaycan xalqının başına gətirilən müsibətlər haqqında həqiqətləri dünya ictimaiyyətinin diqqətinə çatdırmaqdır.
Bakı Şəhər Gənclər və İdman Baş İdarəsinin rəisi Raqif Abbasovun sözlərinə görə, ötən il 20 Yanvar ərəfəsində və Xocalı soyqırımının ildönümü ilə əlaqədar dünyada elektron ünvanlara 30 mindən çox məktub göndərilmişdir. Aksiya Gənclərə Yardım Fondu və Tələbə Gənclər Təşkilatı ilə birlikdə keçirilir.
1990-cı il yanvarın 20-nə keçən gecə Bakıya və Azərbaycanın bir sıra rayonlarına sovet ordusunun, daxili qoşunların hissələri və xüsusi təyinatlı dəstələr daxil olmuşlar. Qanlı aksiya nəticəsində 133 Bakı sakini həlak olmuş, 744 nəfər yaralanmış, 841 adam həbs edilmiş, 5 nəfər itkin düşmüşdür.
Bölmənin digər xəbərləri
